십현담요해

十玄談要解序

玄談十篇乃佛祖玄關非沒量漢莫能覬覦其門戶同安禪師向關裡揬入慈悲忒煞開示迷途不妨益衆生知見山僧重畵蛇安足葛藤上更加枝蔓然月不因指痴兒不能見兎不尋蹏饞虞不能得理會此譚必因指蹏見月得兎了還我葛藤徠成化乙未桃節哉生覇淸寒苾蒭雪岑注飜于瀑泉山中

十玄談이라

열가짓玄妙ᄒᆞᆫ마리라

[요해]談ᄋᆞᆫ字說레云호ᄃᆡ和懌而悅言之ㅣ라ᄒᆞ니同安禪師ㅣ洞明玄旨ᄒᆞ야樂以告人也ㅣ라

談ᄋᆞᆫ字사굔게닐오ᄃᆡ편안코즐겨깃거셔말호미라ᄒᆞ니同安禪師ㅣᄉᆞᄆᆞᆺ玄妙ᄒᆞᆫᄆᆞᆯᄅᆞᆯᄇᆞᆯ겨셔즐겨사ᄅᆞᆷᄃᆞ려니ᄅᆞ다

同安常察禪師ㅅ述이라

同安常察禪師ㅅ지ᅀᅩᆫ거시라

按傳燈錄애云호ᄃᆡ洪州鳳捿山同安院常察禪師ᄂᆞᆫ九峯山道虔禪師之法嗣ㅣ니乃靑原ㅅ第六世孫也ㅣ라

傳燈錄애닐오ᄃᆡ洪州ㅣ鳳捿山同安院常察禪師ᄂᆞᆫ九峯山道虔禪師ㅅ法니ᅀᅳ신祖師ㅣ시니靑原ㅅ여슷잿손ᄌᆡ시니라

五派源流圖

序曰夫玄談妙句ㅣ逈出三乘ᄒᆞ야旣不混緣ᄒᆞ며亦非獨立이라

序ᄒᆞ야닐오ᄃᆡ기픈말ᄉᆞᆷ과微妙ᄒᆞᆫ句ㅣᄠᅩ로三乘에나_{三乘은聲聞과緣覺과菩薩왜라}ᄒᆞ마因緣에섯디아니ᄒᆞ며ᄯᅩᄒᆞ오ᅀᅡ셔디아니ᄒᆞ논디라

不混緣故로其言이灑落ᄒᆞ고非獨立故로其語ㅣ平常ᄒᆞ니只在人人脚跟下애照顧ㅣ니라

因緣에섯디아니ᄒᆞᆯᄉᆡ그말ᄉᆞ미灑落ᄒᆞ고_{灑落ᄋᆞᆫᄀᆞᆺᄀᆞᆺᄒᆞᆯ시라}ᄒᆞ오ᅀᅡ셔디아니ᄒᆞᆯᄉᆡ그마리平常ᄒᆞ니젼혀사ᄅᆞ미다脚跟아래_{脚跟ᄂᆞᆫ밧뒤츠기니本來ᄒᆞ논이리니話頭ㅣ라}ᄉᆞᆯ펴보매잇ᄂᆞ니라

當臺應用호미如朗月以晶空이오轉影泯機ㅣ似明珠而隱海ᄒᆞ니라

臺예_{臺ᄂᆞᆫ鏡臺ㅣ라}연저두고셔마초ᄡᅮ미ᄆᆞᆯᄀᆞᆫᄃᆞ리虛空애빗남ᄀᆞᆮ고그르메ᄅᆞᆯ옮기며조가ᄀᆞᆯ업게호미ᄆᆞᆯᄀᆞᆫ구스리바ᄅᆞ래수멧ᄂᆞᆫᄃᆞᆺᄒᆞ니라

當臺ᄂᆞᆫ如鏡之當臺也ㅣ라應用ᄋᆞᆫ如明鏡이當臺ᄒᆞ야胡來胡現ᄒᆞ며漢來漢現也ㅣ라明珠ᄂᆞᆫ即蚌珠ㅣ라自心印느로至正位前一色히皆在當人受用ᄒᆞ야歷歷然無隱也ㅣ니라轉影泯機ᄂᆞᆫ言雖在當人受用이나然而心體無相ᄒᆞ며境本虛假ㅣ라擡搦吹拍을不可思議ᄒᆞ리니三贒十聖이不可窺覬ㅣ어니愽地凡夫ㅣ何能擬議리오故로古德이云호ᄃᆡ鴛鴦을繡出從君看이언뎌ᇰ不把金鍼ᄒᆞ야度與人이니라ᄒᆞ도다

臺예연젯다호ᄆᆞᆫ거우뢰臺예연저숌ᄀᆞᆮ다호미라마초ᄡᅳ다호ᄆᆞᆫᄆᆞᆯᄀᆞᆫ거우뢰臺예연저숌ᄀᆞᆮᄒᆞ야되오나ᄃᆞᆫ되나ᄐᆞ며江南사ᄅᆞ미오나ᄃᆞᆫ江南사ᄅᆞ미나ᄐᆞᆯ시라ᄆᆞᆯᄀᆞᆫ구스른죠개구스리라心印르로브터셔正位前一色애니르리다그사ᄅᆞᄆᆡ受用호매이셔ᄆᆞᆯᄀᆞᆺᄆᆞᆯᄀᆞᆺᄒᆞ야그ᅀᅳᆨ호미업수미니라그르메옮기며조가글업게ᄒᆞ다호ᄆᆞᆫ비록그사ᄅᆞᄆᆡ受用애이시나ᄆᆞᅀᆞᆷ얼구리야ᇰᄌᆡ업스며境이本來거즛거시라들며누ᄅᆞ며불며튜믈_{들며누ᄅᆞ며불며튜ᄆᆞᆫ푸ᇰ류ᄒᆞᆯ젯이리라}어로짐쟉몯호ᄆᆞᆯ니ᄅᆞ니三贒十聖이_{三賢ᄂᆞᆫ十住와十行과十廻向이오十聖ᄋᆞᆫ十地菩薩이라}어로엿오디몯ᄒᆞ거니미혹ᄒᆞᆫ凡夫ㅣ엣디짐쟉ᄒᆞ리오그럴ᄉᆡ古德이닐오ᄃᆡ鴛鴦ᄋᆞᆯ_{鴛鴦ᄋᆞᆫ새라}繡ᄯᅥ내야그ᄃᆡᄅᆞᆯ보욜디언뎌ᇰ쇠바ᄂᆞᆯ자바사ᄅᆞᄆᆞᆯ주디몯ᄒᆞ리라ᄒᆞ도다

且學徒ㅣ有等ᄒᆞ고妙理無窮ᄒᆞ야達事者ㅣ稀ᄒᆞ고迷源者ㅣ衆이라

ᄇᆡ홀무리差等이잇고微妙ᄒᆞᆫ理ᄂᆞᆫ다ᄋᆞᆯ업서일ᄉᆞᄆᆞᆺ알리드믈오根源에어즐ᄒᆞ리한디라

雲峯이云호ᄃᆡ設有十箇五箇ㅣ라도走上走下ᄒᆞ며半靑半黃호ᄃᆡ惣道我會了也호라ᄒᆞ야各各自謂握龍虵之寶호라ᄒᆞᄂᆞ니孰肯知非ㅣ리오及乎編辟挨拶將來건댄直是萬中無一리로다

雲峯이라홀祖師ㅣ니ᄅᆞ샤ᄃᆡᄒᆡᇰ혀열낫다ᄉᆞᆺ낫치라도_{열낫과다ᄉᆞᆺ낫ᄎᆞᆫ조심ᄒᆞᆯ사ᄅᆞ미라}노ᄑᆞᆫᄃᆡᄃᆞᄅᆞ며ᄂᆞᆺ가온ᄃᆡᄃᆞᄅᆞ며_{노ᄑᆞᆫᄃᆡ와ᄂᆞᆺ가온ᄃᆡᄃᆞᆮ다호ᄆᆞᆫ믿귿모ᄅᆞ닷마리라}半만프르며半만누르로ᄃᆡ_{菓實이半만설오半만니근야ᇰᄌᆡ라}다닐오ᄃᆡ내아노라ᄒᆞ야各各龍虵ᄋᆡ보ᄇᆡᄅᆞᆯ자뱃노라ᄒᆞᄂᆞ니_{龍虵ᄋᆡ보ᄇᆡᄂᆞᆫ貴ᄒᆞᆫ보ᄇᆡ라}뉘왼주ᄅᆞᆯ알리오혀ᄌᆡ서러텨다와다오매_{혀ᄌᆡ서러텨다왇다호ᄆᆞᆫ實ᄒᆞᆫᄯᅡ徵問ᄒᆞᆯ시라}젼혀一萬애ᄒᆞ나토업도다ᄒᆞ시다

森羅萬象物物上明이언마ᄅᆞᆫ

森羅萬象物物우희ᄇᆞᆰ갯건마ᄅᆞᆫ

只在世間上逆順境界ᄒᆞ야人人이各自受用이언마ᄅᆞᆫᄒᆞ다

젼혀世間ㅅ구ᄌᆞ며됴ᄒᆞᆫ境界예이셔사ᄅᆞᆷ마다各各제受用ᄒᆞ건마ᄅᆞᆫ혼마리라

或理事늘雙祛ᄒᆞ야名言이俱喪ᄒᆞᆯᄉᆡ

或理와事와둘ᄒᆞᆯ버ᇰ으리와다일홈과말ᄉᆞᆷ괘업슬ᄉᆡ

理事雙祛ᄂᆞᆫ言善能回互ᄒᆞᆯ시오名言俱喪ᄋᆞᆫ言不可名狀ᄒᆞᆯ시니此法이太近而彌遠이라雖在眼前이나爭奈不見가

理와事와둘ᄒᆞᆯ버ᇰ으리왇다호ᄆᆞᆫ이대수이回互호ᄆᆞᆯ니ᄅᆞ고_{回互ᄂᆞᆫ서ᄅᆞ回避ᄒᆞᆯ시니理나ᄐᆞᆫᄯᅡ해事ㅣ숨고事나ᄐᆞᆫᄯᅡ해理수믈시라}일홈과말ᄉᆞᆷ괘다업다호ᄆᆞᆫ어로일홈얼굴몯ᄒᆞᆯ시니이法이ᄀᆞ자ᇰ갓가오ᄃᆡᄀᆞ자ᇰ머러비록눈알ᄑᆡ이셔도아니몯보ᄂᆞ녀

是以로殷勤指月ᄒᆞ노니莫錯端倪어다

이럴ᄉᆡ브즈러니ᄃᆞᄅᆞᆯᄀᆞᄅᆞ치노니그틀그ᄅᆞ아디마롤디어다

指月ᄅᆞᆫ以指로示月이니如世間慈母ㅣ敎小兒호ᄃᆡ以指로示月ᄒᆞ다가及乎見月ᄒᆞ면便忘示指ᄒᆞ논디如善知識이以言語文字로指示眞法ᄒᆞ다가及乎深造ᄒᆞ면便知此法이非言語文字ᅟᅵᆫᄃᆞᆯᄒᆞᆯ시라

ᄃᆞᆯᄀᆞᄅᆞ치다호ᄆᆞᆫ쏜(손)ᄭᅡ라고로ᄃᆞᄅᆞᆯᄀᆞᄅᆞ쵸미니世間에子息ᄉᆞ라ᇰᄒᆞᄂᆞᆫ어미아ᄒᆡᄅᆞᆯᄀᆞᄅᆞ쵸ᄃᆡ쏜ᄭᅡ라ᄀᆞ로ᄃᆞᄅᆞᆯᄀᆞᄅᆞ치다가ᄃᆞᆯ옷보면믄득ᄀᆞᄅᆞ치던쏜(손)ᄭᅡ라ᄀᆞᆯ닛논디善知識이말ᄉᆞᆷ과文字로眞實ᄒᆞᆫ法블ᄀᆞᄅᆞ치다가ᄉᆞ외알면곧이法이말ᄉᆞᆷ文字ㅣ아뇨ᄆᆞᆯ아롬ᄀᆞᆮᄒᆞᆯ시라

不迷透水之鍼ᄒᆞ야ᅀᅡ可付開拳之寶ㅣ니라

므레ᄉᆞᄆᆞᄎᆞᆫ바ᄂᆞᄅᆞᆯ어즐티아니ᄒᆞ야ᅀᅡ어로쏜(손)편보ᄇᆡᄅᆞᆯ맛디리라

第十五祖伽那提婆ㅣ謁龍樹大士ᄒᆞ야시ᄂᆞᆯ龍樹ㅣ知是智人인ᄃᆞᆯᄒᆞ고以滿鉢水로示之ᄒᆞ신대伽那提婆ㅣ即以一鍼으로投之ᄒᆞ시고欣然契會ᄒᆞ시니上句ᄂᆞᆫ言學人이於此言下애豁然契悟ᄒᆞᆯ시라又二十四祖師子比丘ㅣ遇一長者ㅣ引一子曰此子ㅣ名曰斯多ㅣ니當生애便拳左手ᄒᆞ니願聞宿因ᄒᆞ노ᅌᅵ다師即以手로提接曰還我珠來ᄒᆞ라ᄒᆞ신대童子遽開手ᄒᆞ야奉珠ᄒᆞ야ᄂᆞᆯ衆皆驚異ᄒᆞᆫ대師曰吾ㅣ前爲僧時예有童子ㅣ名이婆舍ㅣ러니吾ㅣ赴西海齋ᄒᆞ야受嚫珠ᄒᆞ야付之호니今還吾珠ㅣ理固然矣니라ᄒᆞ야시ᄂᆞᆯ長者ㅣ遂捨其子ᄒᆞ야出家ᄒᆞᆫ대師ㅣ即授具戒ᄒᆞ시고以前緣故로名ᄋᆞᆯ婆舍斯多ㅣ라ᄒᆞ샤以爲法嗣ᄒᆞ시니下句ᄂᆞᆫ言若於此言下애契悟則은便能印可ᄒᆞ야以爲嫡子矣리라

열다ᄉᆞᆺ잿祖師伽那提婆ㅣ龍樹大士ㅅᄭᅴ뵈ᅀᆞ와ᄂᆞᆯ龍樹ㅣ智慧로왼사ᄅᆞ민ᄃᆞᆯ아ᄅᆞ시고바리예ᄀᆞᄃᆞᆨᄒᆞᆫ므를뵈신대伽那提婆ㅣ즉재ᄒᆞᆫ바ᄂᆞᆯ로더디시고깃거아ᄅᆞ시니웃句ᄂᆞᆫᄇᆡ홀사ᄅᆞ미이十玄談애훤히아로ᄆᆞᆯ니ᄅᆞ시니라ᄯᅩ스믈넷잿祖師師子比丘ㅣᄒᆞᆫ長者ᄅᆞᆯ맛나니ᄒᆞᆫ아ᄒᆡᄅᆞᆯ더브러와셔ᄉᆞᆯ오ᄃᆡ이子息이일호미斯多ㅣ니날제곧왼녁소ᄂᆞᆯ주옛ᄂᆞ니아ᄅᆡᆺ因緣ᄂᆞᆯ듣ᄌᆞ와지이다ᄒᆞ야ᄂᆞᆯ祖師ㅣ즉재쏘노로자바니ᄅᆞ샤ᄃᆡ내구쓸(슬)도로달라ᄒᆞ신대그아기즉재쏜(손)펴구쓸(슬)받ᄌᆞ와ᄂᆞᆯ모다놀라荒唐히너긴대祖師ㅣ니ᄅᆞ샤ᄃᆡ내前네쥬ᇰ도외여실제아ᄒᆡ이쇼ᄃᆡ일호미婆舍ㅣ러니내西ㅅ녁바ᄅᆞᆺ僧齋예가施與혼구쓸(슬)바다맛됴니이제내구쓸(슬)도로주미理예올ᄒᆞ니라ᄒᆞ야시ᄂᆞᆯ長者ㅣ즉재그子息글내야出家ᄒᆞᆫ대祖師ㅣ즉재ᄀᆞᄌᆞᆫ戒法블맛디시고前因젼ᄎᆞ로일호ᄆᆞᆯ婆舍斯多ㅣ라ᄒᆞ샤法嗣ᄅᆞᆯ사ᄆᆞ시니_{法嗣ᄂᆞᆫ法니ᅀᆞᆫ弟子ㅣ라}아랫句ᄂᆞᆫᄒᆞ다가이十玄談애알면즉재印可ᄒᆞ야_{印可ᄂᆞᆫ善知識이올타ᄒᆞᆯ시라}親ᄒᆞᆫ子息이도외리라

略序微言ᄒᆞ야以彰事理ᄒᆞ노라

잠간그ᅀᅳᆨᄒᆞᆫ마ᄅᆞᆯ베퍼事와理와ᄅᆞᆯ나토노라

微言ᄂᆞᆫ隱密之言이니千聖不傳之宗旨也ㅣ라

그ᅀᅳᆨᄒᆞᆫ마ᄅᆞᆫ隱密ᄒᆞᆫ말ᄉᆞ미니千聖이傳티아니ᄒᆞ샨ᄆᆞᆯ리라

辨題目이라

題目ᄀᆞᆯᄒᆡ야닐오미라

須分明見心印而後에ᅀᅡ知祖意ᄒᆞ고知祖意而後에ᅀᅡ悟玄機ᄒᆞ고悟玄機而後에ᅀᅡ辨塵異ᄒᆞ고辨塵異則佛敎늘可審ᄒᆞ고審佛敎則便能還鄕ᄒᆞ고還鄕而後에須知非住ㅣ니須知非住ㅣ나不能廻機ᄒᆞ면亦是滲漏ㅣ론故로廻機之後에須識轉位ㅣ오轉位之後에一色이泠然ᄒᆞ야無可比方일ᄉᆡ須明一色ᄒᆞ야ᅀᅡ乃可和座子撞倒ᄒᆞ야荆棘林中에恬然下脚ᄒᆞ며夜明簾外예脫體朝君ᄒᆞ리니明了一色ᄒᆞ면卽見心印이라一玄談裏예各具十門ᄒᆞ야總持無窮ᄒᆞ리라

모로매子細히心印ᄅᆞᆯ본後에ᅀᅡ祖師ㅅᄠᅳ들알오_{祖師ᄂᆞᆫ達摩ㅣ라}祖師ㅅᄠᅳ들안後에ᅀᅡ玄妙ᄒᆞᆫ조가ᄀᆞᆯ알오玄妙ᄒᆞᆫ조가ᄀᆞᆯ안後에ᅀᅡ듣글와달오ᄆᆞᆯᄀᆞᆯᄒᆡ오_{듣그ᄅᆞᆫ世間ᄂᆞᆯ니ᄅᆞ니라}듣글와달오ᄆᆞᆯᄀᆞᆯᄒᆡ면뿌(부)텻敎文ᄂᆞᆯ子細히알오뿌(부)텻敎文ᄂᆞᆯ子細히알면곧수이本鄕으로도라가고本鄕으로도라간後에모로매몯이수(슈)ᄆᆞᆯ아롤디니비록몯이술(슐)주ᄅᆞᆯ아롤디나조가ᄀᆞᆯ쑤(수)이도ᄅᆞ디몯ᄒᆞ면그도스믜여디ᄂᆞᆫ고딘젼ᄎᆞ로_{스믜여듀ᄆᆞᆫ眞如에잇디몯ᄒᆞ야情見느로모ᄅᆞ게내ᄃᆞᄅᆞᆯ시라}조가ᄀᆞᆯ횟도ᄅᆞᆫ後에모로매位(ㅣ)올모ᄆᆞᆯ알오_{位ᄂᆞᆫ正位(ㅣ)라}位(ㅣ)ᄅᆞᆯ올ᄆᆞᆫ後에ᄒᆞᆫ비치ᄆᆞᆯ가어로가ᄌᆞᆯ빌ᄯᅡ히업슬ᄉᆡ모로매ᄒᆞᆫ비ᄎᆞᆯᄇᆞᆯ겨ᅀᅡ_{ᄒᆞᆫ비ᄎᆞᆫ正位(ㅣ)알ᄑᆡᆺ一色이라}어로안ᄭᅢ조쳐두의텨가ᄉᆡ숨픐가온ᄃᆡ便安히거ᄅᆞ며바ᄆᆡᄇᆞᆯᄀᆞᆫ발밧긔모ᄆᆞᆯ버서님굼ᄭᅴ뵈ᅀᆞ오리니ᄒᆞᆫ비ᄎᆞᆯᄉᆞ외ᄇᆞᆰ기면곧心印ᄂᆞᆯ볼디라ᄒᆞᆫ玄談소개열法門이ᄀᆞ자모도자보미그지업스리라

立題

心印

심인(心印)이라

ᄆᆞᅀᆞᆷ印이라

[요해]達摩ㅣ西來ᄒᆞ샤不立文字ᄒᆞ시고單傳心印ᄒᆞ샤直指人心ᄒᆞ샤見性成佛이라ᄒᆞ시니此印ᄂᆞᆫ不可以語言文字로形容이라於日用事物上動靜語默時예文彩全彰ᄒᆞ야當處歷然이론故로曰心印이라ᄒᆞ다

達摩ㅣ西ᄮᅧᆨ고로셔오샤文字ᄅᆞᆯ셰디아니ᄒᆞ시고다ᄆᆡᆫᄆᆞᅀᆞᆷ印ᄂᆞᆯ傳ᄒᆞ샤바ᄅᆞ사ᄅᆞᄆᆡᄆᆞᅀᆞᄆᆞᆯᄀᆞᄅᆞ치샤性ᄋᆞᆯ보아뿌(부)텨도ᄋᆡ리라ᄒᆞ시니이印ᄂᆞᆫ어루말ᄉᆞᆷ文字로얼굴몯홀디라日用事物웃뮈며괴외ᄒᆞ며말ᄉᆞᆷᄒᆞ며ᄌᆞᆷᄌᆞᆷᄒᆞ얫ᄂᆞᆫ時節ᄋᆡ文彩ㅣ오로나타그고대ᄆᆞᆯᄀᆞᆺᄆᆞᆯᄀᆞᆺᄒᆞ얫ᄂᆞᆫ젼ᄎᆞ로닐오ᄃᆡᄆᆞᅀᆞᆷ印이라ᄒᆞ다

問君ᄒᆞ노라心印ᄂᆞᆫ作何顔고心印늘何人이敢授傳ᄒᆞ리오

그ᄃᆡᄃᆞ려묻노라ᄆᆞᅀᆞᆷ印ᄂᆞᆫ엇던야ᇰᄌᆞ오ᄆᆞᅀᆞᆷ印ᄂᆞᆯ어ᄂᆞ사ᄅᆞ미구ᄐᆡ여주거니받거니ᄒᆞ리오

[요해]達摩ㅣ不將心印而來ᄒᆞ시며二祖ㅣ不求心印而往ᄒᆞ시니授个什摩ㅣ며傳个什摩오畢竟作麽生道오寒時예向火ᄒᆞ고熱時예乘凉이니라

達摩ㅣ心印ᄂᆞᆯ가져오디아니ᄒᆞ시며二祖ㅣ心印ᄂᆞᆯ求ᄒᆞ야가디아니ᄒᆞ시니므스글주시며므스글바ᄃᆞ뇨내죠ᇰ애엣디니르리오치온제블ᄧᅩ고더온제ᄇᆞᄅᆞᆷᄡᅬ놋다

歷刦에然ᄒᆞ야無異色이어ᄂᆞᆯ呼爲心印이라ᄒᆞ면早虛言이니라

歷刦에훤츨ᄒᆞ야다ᄅᆞᆫ비치업거ᄂᆞᆯ心印이라니ᄅᆞ면ᄇᆞᆯ셔거ᄌᆞᆽ마리라

[요해]亘古亘今애妙體ㅣ如如ᄒᆞ야聖不能增ᄒᆞ며凡不能減ᄒᆞ니若論奇特事ᅟᅵᆫ댄自己ㅣ却成魔ᄒᆞ리라

녜록이져록微妙ᄒᆞᆫ얼구리뮈디아니ᄒᆞ야聖人ᄭᅴ도더으디아니ᄒᆞ며凡夫의게도더디아니ᄒᆞ니ᄒᆞ다가奇特ᄒᆞᆫ이ᄅᆞᆯ議論홀딘댄제곧外道ㅣ도ᄋᆡ리라

須知호리라本自靈空性이將喩紅爐火裏蓮이로다

모로매아로리라本來스스로靈ᄒᆞ고업슨性이자ᇰ(쟈ᇰ)ᄎᆞ단火爐ㅅ블소갯蓮이로다

[요해]這个心印이如火裏蓮花ᄒᆞ야看之似有ᄒᆞ나取之不可ㅣ니라

이心印이블소갯蓮ᄭᅩ지ᄀᆞᆮᄒᆞ야보매ᄂᆞᆫ잇ᄂᆞᆫᄃᆞᆺᄒᆞ나가죠ᄆᆞᆫ몯ᄒᆞ리라

莫以無心을云是道ㅣ라ᄒᆞ라無心이라ᄒᆞ야도猶隔一重關ᄒᆞ라

無心을道ㅣ라ᄒᆞ디말라無心이라ᄒᆞ야도ᄒᆞᆫᄀᆞᆲ關이ᄀᆞ리리라_{關ᄂᆞᆫ어려온ᄯᅡ해城ᄀᆞ리ᄊᆞ고사ᄅᆞᆷ몯ᄃᆞᆫ니게혼ᄯᅡ히라}

[요해]自初句로至六句히極論忘情絕慮ᄒᆞ야模索不得底消息ᄒᆞ니宛是無心이로다마ᄅᆞᆫ然이나一向忘情絕慮ᄒᆞ면怕落空去ᄒᆞ야不能進步ᄒᆞ리니須知호리라事在無事裏ᄒᆞ야ᅀᅡ始得ᄒᆞ다

첫句로브터셔여ᄉᆞᆺ句에니르리ᄀᆞ자ᇰᄠᅳ들니ᄌᆞ며혜아료미그처잡디몯홀아ᄎᆞᆯ議論ᄒᆞ니젼혀無心ᄒᆞᆫᄃᆞᆺᄒᆞ도다마ᄅᆞᆫ그러나ᄒᆞᆫᄀᆞᆯᄋᆞ티ᄠᅳᆮ닛고혜요미그츠면虛空애딜가ᄒᆞ야저푼디라수이나ᅀᅡ가디몯ᄒᆞ리니모로매아로리라이리일업ᄉᆞᆫᄯᅡ해이셔ᅀᅡ올타

祖意

祖意ㅣ라

祖師ㅅᄠᅳ디라_{祖師ᄂᆞᆫ達摩ㅣ라}

[요해]達摩ㅣ遙知此土애有大乘根機ᄒᆞ샤得得而來ᄒᆞ샤單提此印ᄒᆞ샤開示迷塗ᄒᆞ시니若於文字上애薦得이라도猶且不堪이온況於沒文字上애薦得이면何啻白雲萬里리오直須未屙已前에承當ᄒᆞ야ᅀᅡ始得하다

達摩ㅣ아ᅀᆞ라히이ᄯᅡ해大乘根機잇ᄂᆞᆫᄃᆞᆯ觀ᄒᆞ시고부러오샤다ᄆᆡᆫ이印ᄋᆞᆯ자ᄇᆞ샤迷惑ᄒᆞᆫ길ᄒᆞᆯ여러뵈시니ᄒᆞ다가文字애아로려ᄒᆞ야도오히려맛디몯ᄒᆞ곤ᄒᆞᄆᆞᆯ며文字업슨고대아로려ᄒᆞ면엣디白雲萬里ᄲᅮᆫ니리오_{白雲萬里ᄂᆞᆫ어멀시라}모로매大便아니본前에아라ᅀᅡ올타_{大便아니본前이라호ᄆᆞᆫ조각ᄲᆞᄅᆞᆫ적이라}

祖意如空호ᄃᆡ不是空이니眞機ㅣ爭墮有無功이리오

祖師ㅅᄠᅳ디업슨ᄃᆞᆺ호ᄃᆡ업디아니ᄒᆞ니眞實ㅅ조각이엣뎌잇다업다혼功夫에디리오

[요해]若言空也ᅟᅵᆫ댄心印이全彰ᄒᆞ고若言不空ᅟᅵᆫ댄了沒巴鼻ᄒᆞ니畢竟에作麽生道오山高海深이오日生月落이로다

ᄒᆞ다가닐오ᄃᆡ업다ᄒᆞ린댄ᄆᆞᅀᆞᆷ印이젼혀낟고ᄒᆞ다가닐오ᄃᆡ업디아니타ᄒᆞ린댄젼혀그티업스니내죵애엣디니ᄅᆞ리오뫼히노ᄑᆞ며바ᄅᆞ리깁고ᄒᆡ도ᄃᆞ며ᄃᆞ리디놋다

三贒이尙未明斯旨어니十聖인ᄃᆞᆯ那能達此宗이리오

三賢이오히려이ᄆᆞᆯᄅᆞᆯᄉᆞ외아디몯거니十聖인ᄃᆞᆯ엣뎌수이이ᄆᆞᆯᄅᆞᆯᄉᆞᄆᆞᆺ알리오

[요해]三贒ᄂᆞᆫ指十住와十行과十廻向ᄒᆞ고十聖은指十地菩薩ᄒᆞ다涅槃애云호ᄃᆡ菩薩이位階十地ᄒᆞ야도尙不能了了知見佛性이온何況聲聞緣覺之人이能得見耶아譬如醉人이欲涉遠路호ᄃᆡ蒙籠見道ᄐᆞᆺᄒᆞ니十地菩薩이於如來知見에少分도亦復如是ᄒᆞ다

三賢ᄂᆞᆫ十住와十行과十廻向ᄋᆞᆯ니ᄅᆞ고十聖ᄋᆞᆫ十地菩薩ᄅᆞᆯ니ᄅᆞ니라涅槃애닐오ᄃᆡ菩薩이位ㅣ十地예올아도오히려수이ᄆᆞᆯᄀᆞᆺᄆᆞᆯᄀᆞᆺ시佛性ᄋᆞᆯ알며보ᄆᆞᆯ몯ᄒᆞ곤ᄒᆞᄆᆞᆯ며聲聞緣覺인사ᄅᆞ미수이보리아가ᄌᆞᆯ비건댄쑤(수)을醉ᄒᆞᆫ사ᄅᆞ미먼길ᄒᆞᆯ가고져호ᄃᆡ길보미어즐ᄐᆞᆺᄒᆞ니十地菩薩이뿌(부)텻知見에아니한分도이ᄀᆞᆮ다

透網金鱗이猶滯水ᄒᆞ고廻途石馬ㅣ出沙籠ᄒᆞ도다

그므를ᄉᆞᄆᆞᄎᆞᆫ金고기오혀려므레걸ᄭᅥ(ᄭᅧ)ᄭᅩ길ᄒᆞᆯ횟도ᄂᆞᆫ돌ᄆᆞ리몰애ᄭᅵᆫᄃᆡ나도다

[요해]三賢十聖이不能透脫호미如金鱗이透網호ᄃᆡ猶滯死水ᄐᆞᆺᄒᆞ니須善能回互ᄒᆞ야不坐正位ᄒᆞ야頓脫撈籠ᄒᆞ야ᅀᅡ始得ᄒᆞ다石馬ㅣ本無ᄒᆞ야但有假名이니指正位ᄒᆞ다

三賢十聖이수이ᄉᆞᄆᆞ차버서나디몯호미金고기_{金고기ᄂᆞᆫ三賢十聖ᄋᆡ功夫드료ᄆᆞᆯ衆生이모다보ᄂᆞᆫ야ᇰᄌᆡ金고기빗난야ᇰᄀᆞᆮᄒᆞᆯ시니녜牛頭山懶融禪師ㅣ二祖아니보ᅀᆞ와신젠새ᄃᆞᆯ히모다곳믈오供養ᄒᆞᅀᆞᆸ다가二祖보ᅀᆞ온後엔새ᄃᆞᆯ히곳믈오몯얻ᄌᆞ오니이ᄂᆞᆫ새모다곳믈오供養ᄒᆞᆯ적이라}그므를ᄉᆞᄆᆞ초ᄃᆡ주근므레걸ᄭᅦ(ᄭᅨ)ᄯᅳᆺᄒᆞ니_{주근므른설설흐르디아니ᄒᆞᄂᆞᆫ므리니三賢十聖이功夫잇ᄂᆞᆫᄯᅡ해머므러뿌(부)텨ᄀᆞᆮ티三界밧긔自在히노니디몯ᄒᆞᆯ시라}모로매이대수이回互ᄒᆞ야正ᄒᆞᆫ位예안잿디아니ᄒᆞ야믄득얼긴ᄯᅡ해버서나ᅀᅡ올타돌ᄆᆞ리本來업서ᄒᆞᆫ갓假借혼일훔ᄲᅮᆫ이니正位(ㅣ)ᄅᆞᆯ니ᄅᆞ다

殷勤爲說西來意ᄒᆞ노니莫問西來及與東ᄒᆞ라

브즈러니爲ᄒᆞ야西ㅅ녁고로셔오샨ᄠᅳ들니ᄅᆞ노니西ㅅ녁고로셔오다東녁긔잇다호ᄆᆞᆯ묻디말라

[요해]祖師西來ㅣ雖是老婆心切이나爭奈淸風이匝地어니何오

祖師ㅣ西ㅅ녁고로셔오샤미비록늘근할ᄆᆡᄆᆞᅀᆞ미至極ᄒᆞ시나_{늘근할ᄆᆡᄆᆞᅀᆞ미라호ᄆᆞᆫ늘근할미孫子ᄉᆞ라ᇰ호미至極ᄒᆞ니뿌(부)텨祖師ㅣ衆生에엿비너교미이ᄀᆞᆮᄒᆞ니라}아니淸風이ᄯᅡ해ᄀᆞᄃᆞᆨ이횟돌어니엣디ᄒᆞ료_{淸風은虛空애ᄇᆞᄅᆞᆷ업슨ᄯᅡ업수미本分受用이저마다업스니업숨ᄀᆞᆮᄒᆞ니라}

玄機

玄機ㅣ라

玄妙ᄒᆞᆫ조각이라

[요해]一轉關捩子ㅣ玲玲瓏瓏ᄒᆞ며宛宛轉轉ᄒᆞ야逈出塵機ㅣ라不守一智ᄒᆞ야縱橫逆順애無有隔礙ᄒᆞ니且道ᄒᆞ라如何是玄機오昨日醉酒罵人이러니今夕어(에)燒香作禮ㅣ로다

ᄒᆞᆫ번轉ᄒᆞᄂᆞᆫ關捩子ㅣ_{轉은ᄣᅬ올시오關捩子ᄂᆞᆫ챠ᅀᆞ토ᇰᄀᆞᆮᄐᆞᆫ거시라}玲玲瓏瓏ᄒᆞ며_{玲玲瓏瓏은구쓸(슬)구ᄋᆞᄂᆞᆫ야ᇰᄌᆡ라}宛宛轉轉ᄒᆞ야_{宛宛轉轉은구름섯도ᄂᆞᆫ야ᇰᄌᆡ라}머리世間ㅅ조각애내ᄃᆞ라ᄒᆞᆫ智慧ᄅᆞᆯ맛다ᄯᅵ아니ᄒᆞ야바ᄅᆞ며빗그며어려오며됴호매ᄀᆞ료미업스니니ᄅᆞ라어늬玄妙ᄒᆞᆫ조각고어젓긔수울醉코사ᄅᆞᆷ구짓더니오ᄂᆞᆯ나죈香받ᄌᆞᆸ고저ᅀᆞᆸ놋다

迢迢空刦에勿能收ㅣ로소니豈爲塵機ㅣ라作繫留ㅣ리오

먼뷘刦에수이가도디몯ᄒᆞ리로소니엣뎌世間ㅅ조각이도외여ᄆᆡ야머믈오미도ᄋᆡ리오

[요해]空刦之前에沒可收摺이어니塵機之內예那能繫留ㅣ리오方信道호리라漢地예不拘ᄒᆞ고秦不管ᄒᆞ야又騎驢子ᄒᆞ고向楊州ᄒᆞᄂᆞ다

뷘刦으로前에수이것눌러가도디몯ᄒᆞ거니世間ㅅ조각안해어느수이ᄆᆡ여머믈오료보야호로닐오리라漢ᄯᅡ해걸이디아니ᄒᆞ고秦에걸ᄭᅵ이디아니ᄒᆞ야_{漢과秦과ᄂᆞᆫ나랏일훔이라}ᄯᅩ라귀ᄐᆞ고楊州(ㅣ)로가놋다_{楊州ᄂᆞᆫ됴ᄒᆞᆫᄀᆞ옰일후미니녯사ᄅᆞ미닐오ᄃᆡ허리예錢粮十萬ᄎᆞ고楊州(ㅣ)로가리라ᄒᆞ니이마ᄅᆞᆫ聖凡位예잇기디아니ᄒᆞ고ᄆᆞᅀᆞᆷ난야ᇰᄌᆞ로노니다호미라}

妙體ㅣ本來로無處所ㅣ어니通身히何更問蹤由ㅣ리오

微妙ᄒᆞᆫ얼구리本來로處所ㅣ업거니모로기어느다시根源을무ᄅᆞ리오

[요해]藏身處에沒蹤跡ᄒᆞ고沒蹤跡處에莫藏身이로다龐居士ㅣ問馬祖云호ᄃᆡ不與萬法으로爲侶者ᄂᆞᆫ是什麽人이잇고祖ㅣ云ᄒᆞ샤ᄃᆡ一口에吸盡西江水ᄒᆞ면報與汝道호리라

몸갈ᄆᆞᆫᄯᅡ해자최업고자최업슨ᄯᅡ해몸갊디마놋다龐居士ㅣ馬祖ᄭᅴ묻ᄌᆞ오ᄃᆡ萬法과벋아니삼ᄂᆞ니ᄂᆞᆫ이엇던사ᄅᆞ미잇고馬祖ㅣ니ᄅᆞ샤ᄃᆡᄒᆞᆫ이베西ㅅ녁江므를마시면너ᄃᆞ려닐오리라ᄒᆞ시다

靈然一句ㅣ超羣象ᄒᆞ니逈出三乘이라不假修ㅣ로다

靈ᄒᆞᆫᄒᆞᆫ句ㅣ모ᄃᆞᆫ얼구레너머나니머리三乘에내ᄃᆞ라닷고ᄆᆞᆯ假借티아니ᄒᆞ놋다

[요해]向上一句ㅣ千聖이不傳이니學者ㅣ勞形ᄒᆞ논디如猿이捉影이로다

ᄆᆞᆺ웃ᄒᆞᆫ句ㅣ千聖이몯傳ᄒᆞ시ᄂᆞ니學者ㅣ제몸ᄀᆞᆺ논디나비그르메잡ᄐᆞᆺᄒᆞ도다_{나ᄇᆞᆫ쥬ᇰᄉᆡᇰᄋᆡ일훔이니巴蜀ᄯᅡᆺ믈ᄭᆞᆺ石壁에잇다가ᄃᆞᆯᄇᆞᆯᄀᆞᆫ바ᄆᆡ믌가온ᄃᆡᄃᆞ리비취옛거ᄃᆞᆫ眞實ㅅᄃᆞ린가너겨石壁엣즘게남글ᄒᆞ나히잡고드리어ᄃᆞᆫᄯᅩ버디서ᄅᆞᄇᆞᆯᄒᆞᆯ자바드리여믈ᄭᅡ온ᄃᆡᆺᄃᆞᄅᆞᆯ거료려受苦ᄒᆞᄂᆞ니샹녜參禪ᄒᆞ노라ᄒᆞᄂᆞᆫ사ᄅᆞ미祖師니ᄅᆞ샨方便이올ᄒᆞ시니라ᄒᆞ야몰라受苦로이方便가지고ᄇᆞ리디몯ᄒᆞ야ᄃᆞᆫ니논디이ᄀᆞᆮᄒᆞ니眞實ㅅ뿌(부)텨祖師냇玄妙ᄒᆞᆫ宗旨ᄂᆞᆫᄌᆞ걔내도몰라시니어느衆生이알리오그리모ᄅᆞᆯ거ᄉᆞᆯ아로려ᄒᆞ야祖師내아다니ᄅᆞ샨마ᄅᆞᆯ世間애아ᄂᆞᆫ것아ᄃᆞᆺᄒᆞᆯ거신가ᄒᆞ야功夫ᄅᆞᆯ드리면百刦千生애彌勒이나샤도젼혀아디몯ᄒᆞ리라}

撒手那邊千聖外ᄒᆞ니廻程이라堪作火中牛ㅣ로다

뎌곧_{뎌고든見性ᄒᆞᆫ고디라}千聖밧긔소ᄂᆞᆯᄀᆞ리티고내ᄃᆞᄅᆞ니길ᄒᆞᆯ回互ᄒᆞ논디라븘가온ᄃᆡᆺᄉᆈ라ᄒᆞ얌직ᄒᆞ다

[요해]不坐千聖綣䙡ᄒᆞ고却來這邊ᄒᆞ야行履로다忉忉怛怛ᄒᆞ야服勞爲人ᄒᆞ논디宛似火中之牛ㅣ로다廻程은言不坐正ᄒᆞ며不在偏ᄒᆞ니라

千聖ㅅ綣䙡예_{綣䙡ᄂᆞᆫ옷너ᄂᆞᆫ䙡ㅣ트렛거시라}안ᄯᅵ아니ᄒᆞ고이고대와_{이고ᄃᆞᆫ衆生잇ᄂᆞᆫᄯᅡ히라}ᄃᆞᆮ니놋다브즈러니勤心ᄒᆞ야受苦로왼일ᄒᆞ야사ᄅᆞᆷ爲ᄒᆞ논디븘가온ᄃᆡᆺ쇼ᄀᆞᆮ도다길回互타호ᄆᆞᆫ正位예안ᄯᅵ아니ᄒᆞ며偏位예잇디아니호ᄆᆞᆯ니ᄅᆞ니라_{正位ᄂᆞᆫ第一位ㅣ니理事ㅣ다업슨고디라偏位ᄂᆞᆫ第二位ㅣ니그제ᅀᅡ理事ㅣᄀᆞᆺᄀᆞᆺ지낟ᄂᆞ니라}

塵異

塵異ㅣ라

드틀와달오미라_{드트ᄅᆞᆫ世間이라}

[요해]眞金이出冶ㅣ라不復爲鑛이며荆玉이在𤨢ᄒᆞ야도終不爲珉이며聖人이雖在塵勞中ᄒᆞ야도如蓮이出水ㅣ라不爲淤泥의所染ᄒᆞ며雖和光同塵ᄒᆞ나而不爲混이니라

眞實ㅅ金이붊긔난디라다시즛ᄋᆡ도ᄋᆡ디아니ᄒᆞ며荆山ㅅ玉이𤨢애이셔도_{璞은다ᄃᆞᆷ디아니혼玉이라}내죠ᇰ애珉이도ᄋᆡ디아니ᄒᆞ며_{珉은됴ᄒᆞᆫ돌히라}聖人이비록塵勞ㅅ가온ᄃᆡ이셔도蓮이므레난ᄃᆞᆺᄒᆞ야즌ᄒᆞᆰᄀᆡ더러요미도ᄋᆡ디아니ᄒᆞ며비록世間과ᄒᆞᆫ가지나混雜호미도ᄋᆡ디아니ᄒᆞᄂᆞ니라

濁者ㅣ自濁이며淸者ㅣ淸이니菩提煩惱ㅣ等空平이로다

흐리요미절로흐리며ᄆᆞᆯ고미절로ᄆᆞᆯ그니菩提와煩惱ㅣᄒᆞᆫ가지로업고平ᄒᆞ도다

[요해]濁者ㅣ自濁이라不因淸而濁이며淸者ㅣ自淸이라不因濁而淸이며生滅狂情이不因眞如而暗이며眞如妙覺이不因生滅而明이라法法이住位ᄒᆞ며个个ㅣ無依ᄒᆞ야絕對待ᄒᆞ며沒蹤由ㅣ라菩提煩惱自性이皆空ᄒᆞ며生死涅槃眞源이本寂이로다故로聖人이出世ᄒᆞ야混雜塵勞ᄒᆞ시나然其眞機ᄂᆞᆫ逈與塵으로異ᄒᆞ니라

흐린거시절로흐리욘디라ᄆᆞᆯ고ᄆᆞᆯ因ᄒᆞ야흐리디아니ᄒᆞ며ᄆᆞᆯᄀᆞᆫ거시절로ᄆᆞᆯ곤디라흐리요ᄆᆞᆯ因ᄒᆞ야ᄆᆞᆰ디아니ᄒᆞ며_{흐린거ᄉᆞᆫ煩惱ㅣ오ᄆᆞᆯᄀᆞᆫ거ᄉᆞᆫ菩提ㅣ니菩提ᄂᆞᆫᄆᆞᆯ고ᄀᆞᆺᄀᆞᆺᄒᆞᆫᄆᆞᅀᆞ미오煩惱ᄂᆞᆫ어즈럽고흐린ᄆᆞᅀᆞ미라ᄆᆞᅀᆞ미本來ᄀᆞᆺᄀᆞᆺᄒᆞ고ᄌᆞᄂᆞᆨᄌᆞᄂᆞᆨᄒᆞ야마ᇰ랴ᇰ앳흐린거시흐리올주리업건마ᄅᆞᆫᄀᆞᆺᄀᆞᆺᄭᅩ寂靜ᄒᆞᆫ거긔萬象이비취어든ᄆᆞᆺ처ᅀᅥᆷᄒᆞᆫ念이믄득나ᄂᆞᆫᄃᆞᆯ몰라念念마다비취ᄂᆞᆫ거ᄉᆞᆯ좃고本來ᄀᆞᆺᄀᆞᆺᄭᅩ寂靜ᄒᆞᆫ줄런몰라每常흐린어즈러온거시도외여世間上애나며드ᄂᆞᆫᄆᆞᅀᆞ미이실ᄉᆡ둘힌가너깁건마ᄅᆞᆫᄀᆞᆺᄀᆞᆺᄭᅩ寂靜ᄒᆞᆫ거시本來업거니어즈럽고흐린거시어ᄃᆡ이시리오그리면ᄆᆞᆯᄀᆞᆫ것도本來ᄆᆞᆯᄀᆞᆫ거시며흐린것도本來흐린거시라一切萬法이서르섯굴理업스니서ᄅᆞ섯겐ᄂᆞᆫ가ᄒᆞᄂᆞᆫᄆᆞᅀᆞᄆᆞᆫ衆生의迷惑ᄒᆞᆫ마ᇰ랴ᇰ앳혜아료미니샤ᇰ녜브리혯거ᄃᆞᆫ누넷病가진사ᄅᆞ미五色圓光이現ᄒᆞ야뵈어니와누넷病업슨사ᄅᆞ미ᅀᅡ브ᄅᆡᄀᆞᆺᄀᆞᆺᄒᆞ욤ᄲᅮᆫ보ᄂᆞ니衆生의마ᇰ랴ᇰ오로ᄆᆞᅀᆞ미흐리며ᄆᆞᆯᄀᆞᆫ가두가지로너교미이ᄀᆞᆮᄒᆞ니라}나며업스며ᄒᆞᄂᆞᆫ미친ᄠᅳ디眞如로因ᄒᆞ야어듭디아니ᄒᆞ며_{眞如ᄂᆞᆫ菩提와ᄒᆞᆫ가짓거시언마ᄅᆞᆫ아치다ᄅᆞ니菩提ᄂᆞᆫᄆᆞᅀᆞᄆᆡ조코寂靜ᄒᆞᆫ야ᇰᄌᆡ오眞如ᄂᆞᆫ眞實로조코寂靜ᄒᆞᆫ고디一切世間ㅅ動轉업슨아치오ᄯᅩ그아치動轉업수ᄃᆡ너무ᄀᆞᆺᄀᆞᆺᄒᆞ야一切萬法에비취요ᄃᆡ가며오며나며업스며ᄯᅩ이숌도업서혜아림몯ᄒᆞᆯ고ᄃᆞᆯ닐온妙覺이라ᄒᆞ건마ᄅᆞᆫ이세가짓거시아치달아도얼구ᄅᆞᆫᄒᆞᆫ가지라}眞如妙覺이나며업스며ᄒᆞᄂᆞᆫᄆᆞᅀᆞᄆᆞᆯ因ᄒᆞ야ᄀᆞᆺᄀᆞᆺ디아니혼디라法法이位예이시며_{位ᄂᆞᆫ제고디라}낫낫치依據ㅣ업서_{法法이位예잇닷마ᄅᆞᆫᄆᆞᅀᆞ미本來업고ᄆᆞᅀᆞᆷᄭᅡ온ᄃᆡ비췬거시本來寂靜ᄒᆞ야고ᄌᆡ누르며대프르며뫼노ᄑᆞ며믈기푸미젼혀ᄆᆞᅀᆞᄆᆡ圓明호모로그러ᄒᆞᆯᄲᅮᆫ니언뎌ᇰ내누르로라내프르로라내노포라내기푸라홀주리업스며내누르거라프르거라놉거라깁거라홈도업서ᄆᆞᅀᆞᆷ과境과다ᄒᆞᆫ가지로업고寂靜ᄒᆞ면오직ᄆᆞᆯᄀᆞᆫᄒᆞᆫ가짓마시ᄀᆞᆺᄀᆞᆺᄒᆞ야너기도몯ᄒᆞ며니ᄅᆞ도몯ᄒᆞ며ᄂᆞᆷ뵈디도몯ᄒᆞ릴ᄉᆡ各各位예이시며依據ㅣ업다ᄒᆞ니라}서ᄅᆞ마조셔며기ᄃᆞᆯ오미그ᄎᆞ며根源이업순디라菩提煩惱自性이다空ᄒᆞ며살며주그며涅槃ㅅ眞實根源이本來寂靜ᄒᆞᆯᄉᆡ聖人이世間애나샤비록世間塵勞애섯거겨시나眞實ㅅ조각은머리世間과다ᄅᆞ시니라

誰言卞璧를無人鑑이라ᄒᆞᄂᆞ뇨我道驪珠ㅣ到處晶이라호리라

뉘닐오ᄃᆡ卞和ᄋᆡ구쓰ᄅᆞᆯ사ᄅᆞ미보리업다ᄒᆞᄂᆞ뇨내닐오리라모딘龍의구쓰리간ᄃᆡ마다ᄀᆞᆺᄀᆞᆺᄒᆞ얫다호리라

[요해]椘人卞和ㅣ獻荆山之玉於椘厲王ᄒᆞᆫ대王曰石也ㅣ라코遂刖一足ᄒᆞ야ᄂᆞᆯ又獻於武王ᄒᆞᆫ대王이怒ᄒᆞ야又刖一足ᄒᆞ다至於文王ᄒᆞ야和ㅣ抱其𤨢ᄒᆞ고哭於荊山之下ᄒᆞᆫ대王이召問曰호ᄃᆡ刖足者ᄂᆞᆫ何怨乎오和ㅣ曰호ᄃᆡ不怨刖足이오而怨眞玉을以爲凡石이라ᄒᆞ며忠事를以爲慢事ㅣ라ᄒᆞᆯᄉᆡ是以哭之ᄒᆞ노이다王이使玉工으로剖之ᄒᆞ시니乃眞玉也ㅣ러라此ᄂᆞᆫ言圓明妙性이混於塵勞而凡夫ㅣ不識ᄒᆞ야以謂호ᄃᆡ無明이라ᄐᆞᆺᄒᆞ다又河上翁ᄋᆡ家ㅣ貧ᄒᆞ야緯簫而食ᄒᆞ더니其子ㅣ沒川ᄒᆞ야得千金之珠ᄒᆞ야ᄂᆞᆯ謂其子ᄒᆞ야取石而鍛之ᄒᆞ라코曰호ᄃᆡ此珠ㅣ必在驪龍頷下ᄒᆞ니子ㅣ遭其睡也ㅣ로다使其窹ㅣ런댄汝ㅣ當爲虀粉이랏다ᄒᆞ다驪ᄂᆞᆫ黑也ㅣ니毒龍也ㅣ라此ᄂᆞᆫ言一顆明珠을用之有分이오拈之不得이론디如驪龍珠ㅣ價直千金이라不可容易而得이며不可容易而示人이니라雖然如是나人人箇箇예本自圓成ᄒᆞ며本自具足이니라

楚ㅅ사ᄅᆞ민卞和ㅣ_{楚ᄂᆞᆫ나라히오卞은姓이오和ᄂᆞᆫ일훔이라}荊山ㅅ玉을_{荊山은됴ᄒᆞᆫ玉나ᄂᆞᆫ뫼히라}楚ㅅ厲王ᄭᅴ進上ᄒᆞᅀᆞ온대그님구미니ᄅᆞ샤ᄃᆡ돌히로다ᄒᆞ시고즉재ᄒᆞᆫ바ᄅᆞᆯ버혀시ᄂᆞᆯᄯᅩ武王ᄭᅴ進上ᄒᆞᅀᆞ온대그님굼이怒ᄒᆞ야ᄯᅩᄒᆞᆫ바ᄅᆞᆯ버혀ᄂᆞᆯ文王이셔시거ᄂᆞᆯ卞和ㅣ玉무젹(적)을안고荊山ㅅ아래가운대文王이브르샤무르샤ᄃᆡ발버힌사ᄅᆞᄆᆞᆫ므슷이ᄅᆞᆯ怨望ᄒᆞᄂᆞᆫ다ᄒᆞ야시ᄂᆞᆯ卞和ㅣ엳ᄌᆞ오ᄃᆡ발버힌주ᄅᆞᆯ怨望아니ᄒᆞᅀᆞᆸ가니와眞實ㅅ玉을샤ᇰ녯돌히라ᄒᆞ시며忠貞도왼이ᄅᆞᆯ欺弄도왼이리라ᄒᆞ샤ᄆᆞᆯ애ᄃᆞ라우노이다ᄒᆞ야ᄂᆞᆯ文王이玉바치오라ᄒᆞ샤ᄣᆞ리시니眞實ㅅ玉이러라이말닐온ᄠᅳ든圓明코微妙ᄒᆞᆫᄆᆞᅀᆞ미世間에섯ᄭᅦ거ᄃᆞᆫ迷惑ᄒᆞᆫ사ᄅᆞ미아디몯ᄒᆞ야無明이라ᄐᆞᆺᄒᆞ다혼마리라_{無明은本來ᄇᆞᆯ근거긔비췬거시셔거ᄃᆞᆫᄒᆞᆫ念이몰라신제動ᄒᆞ며믄득여러가지로다ᄅᆞᆫ念이나거ᄃᆞᆫ아니本來이야ᇰᄌᆞ로ᄆᆞᆰ디아니ᄒᆞᆫ가ᄒᆞ야ᄇᆞᆯ고ᄆᆞ로셔ᄇᆞᆯ곰업수미도ᄋᆡᄂᆞ니라}ᄯᅩ河上翁이라홀소ᄂᆡ지비가난ᄒᆞ야簫ᄅᆞᆯ엿거_{簫ᄂᆞᆫ뎌ᄀᆞᆮᄒᆞᆫ거시라}값바다먹고사더니제아ᄃᆞ리내헤므ᄌᆞ미ᄒᆞ야千金ᄊᆞᆫ구쓰를어더ᄂᆞᆯ아비아ᄃᆞᆯᄃᆞ려돌해ᄡᅮ처보라ᄒᆞ고닐오ᄃᆡ이구쓰리驪龍ᄋᆡᄐᆞᆨ아래잇ᄂᆞ니네잘저글맛나도다ᄒᆞ다가ᄭᆡ던댄네當當이虀粉이ᄃᆞ외리랏다_{虀粉은粉ᄀᆞ티ᄆᆞᆺ닷마리라}驪ᄂᆞᆫ검다호미니모딘龍이라이리닐오믄ᄒᆞᆫ낫ᄆᆞᆯᄀᆞᆫ구쓰리ᄡᅮᆯ주ᄅᆞᆫ잇고잡디몯ᄒᆞ논디驪龍ᄋᆡ구쓰리비디千金이싸수이얻디몯ᄒᆞ며수이ᄂᆞᆷ뵈디몯호미ᄀᆞᆮ닷마리니비록그러나사ᄅᆞᆷ마다낫낫치本來제올히ᄃᆞ외여이시며本來제ᄀᆞ잿ᄂᆞ니라

萬法泯時예全體ㅣ現ᄒᆞ고三乘分處ㅣ强安名이니라

萬法업슨時節의오ᄋᆞᆫ얼구리낟고三乘ᄂᆞᆫ혼고디구틔여ᄒᆞ다가몯ᄒᆞ야일훔지ᄒᆞ니라_{무로ᄃᆡ얼구리낟다호ᄃᆡ엣디일훔을구틔여지ᄒᆞ뇨ᄃᆡ답호ᄃᆡ얼구리업슨얼구릴ᄉᆡ니라}

[요해]如是之珠ㅣ本來不虧ㅣ언마ᄅᆞᆫ奈緣六塵五蘊ᄋᆡ所覆ᄒᆞ야不能圓現ᄒᆞ니若能坐斷千差ᄒᆞ며圓融一念ᄒᆞ면則其體ㅣ自現이라不可提撕ᄒᆞ리니是故로聖人이應現ᄒᆞ샤曲爲今時ᄒᆞ샤開方便門ᄒᆞ샤分別三乘ᄒᆞ샤使迷者로因漸入頓ᄒᆞ며因頓入圓케ᄒᆞ시니雖說三科ᄒᆞ시나法性이恒一ᄒᆞ니忽有性𢤁漢이不歷階梯ᄒᆞ며不待刦數ᄒᆞ야便能全身擔荷ᄒᆞ면五果四向도猶是剩語ㅣ며住行向地도亦是虛位ㅣ니方信道호리라家有白澤圖이라必無如是恠ᄒᆞ니라

이런구쓰리本來ᄒᆞ야디디아니얫건마ᄅᆞᆫ젼혀六塵과五蘊ᄋᆡ더ᄑᆞᆫ다소로_{六塵은빗과소리와내옴과맛과다횸과가지가짓것괘니이거시조ᄒᆞᆫᄆᆞᅀᆞᄆᆞ로셔눈귀고혀몸ᄠᅳᆮ여ᄉᆞᆺ가짓거ᄉᆞ로나타나本來조ᄒᆞᆫᄆᆞᅀᆞᄆᆞᆯ흐리올ᄉᆡ드트리라ᄒᆞ니라五蘊은빗과비츨드리ᄂᆞᆫ것과너굠과올마감과迷惑ᄒᆞᆫ아롬괘니이다ᄉᆞᆺ가짓거시이쇼ᄃᆡ몬져ᄆᆞᅀᆞ미비ᄎᆞᆯ보고됴홈구좀드려이러토다뎌러토다너길ᄉᆡᄆᆞᅀᆞᆷ이ᄀᆞᆺᄀᆞᆺ고寂靜티몯ᄒᆞ야世間애구으러조ᄒᆞᆫ智慧識이ᄃᆞ외ᄂᆞ니이識이엣디뿌(부)텻아롬과ᄒᆞᆫ가지로ᄃᆡ衆生은識이라커뇨ᄒᆞ란ᄃᆡ뿌(부)텨ᄂᆞᆫᄆᆞᅀᆞᆷ이境낟논주ᄅᆞᆯ아ᄅᆞ실ᄉᆡ智慧ㅣ라ᄒᆞ고衆生은몰랫다가ᄆᆞᅀᆞᆷ이境에낟거ᅀᅡ알ᄉᆡ識이라ᄒᆞᄂᆞ니이런아치ᄂᆞᄆᆡ조ᄒᆞᆫᄆᆞᅀᆞᆷᄭᅡ온ᄃᆡᄢᅳ려𩜼蓄ᄒᆞ야뒤실ᄉᆡ蘊이라ᄒᆞ니蘊字ᄠᅳ들ᄢᅳ릴시라}ᄀᆞᆺᄀᆞᆺ지낟디몯ᄒᆞᄂᆞ니ᄒᆞ다가수이ᄀᆞ마니셔一千가짓差別을그ᄎᆞ며一念이ᄒᆞᆫ게어올면그얼구리절로나타ᄭᆡ아오ᄆᆞᆯ假借티아니ᄒᆞ리니이럴ᄉᆡ뿌(부)톄나샤曲盡히當時ᄅᆞᆯ爲ᄒᆞ샤方便門늘여ᄅᆞ샤三乘法을가ᄅᆞ혀니ᄅᆞ샤ᄒᆡ여곰迷惑한衆生으로漸漸닷고ᄆᆞᆯ因ᄒᆞ야믄득아로매들며아로ᄆᆞᆯ因ᄒᆞ야믄득圓滿ᄒᆞᆫ地位예들에ᄒᆞ시니비록세가짓條目을니ᄅᆞ시나法性은恒常ᄒᆞᆫ가지니믄득性識게여온노미ᄃᆞ리ᄇᆞᆲ디아니ᄒᆞ며時節기ᄃᆞᆯ오디아니ᄒᆞ야믄득모로기모매메면五果四向도_{五果ᄂᆞᆫ預流果와不來果와一來果와無學果와有餘涅槃果왜오四向은預流向과不來向과一來向과無學向괘라}오히려너믄마리며十住十行十迴向十地도거즛位ㅣ니正히닐오리라우리지ᄇᆡᆫ白澤그룐거시잇논디라一定코이런妭恠로왼거시업스니라_{白澤ᄋᆞᆫ모딘쥬ᇰᄉᆡᇰᄋᆡ일후미니지ᄇᆡ그려두면邪氣븓디몯ᄒᆞᄂᆞ니게여온사ᄅᆞ미佛法을게여이알면호ᄀᆞᆫᄃᆞ리ᄇᆞᆯ와뿌(부)텨도ᄋᆡ리라혼마리업수미이ᄀᆞᆮ다}

丈夫ᄂᆞᆫ自有衝天志ㅣ라不向如來行處行ᄒᆞᄂᆞ니라

大丈夫ᄂᆞᆫ제하ᄂᆞᆯᄉᆞᄆᆞᄎᆞᆯᄠᅳ디잇논디라뿌(부)텨ᄃᆞᆫ니던ᄯᅡᄒᆞ로ᄃᆞᆫ니디아니ᄒᆞᄂᆞ니라

[요해]若是英雄漢인댄橫拈大阿神劔ᄒᆞ며倒持金剛寶杵ᄒᆞ야斬盡佛魔情靈ᄒᆞ며擊破涅槃化城ᄒᆞ리니可謂獨行獨步無障礙ㅣ라不風流處에自風流ㅣ로다

ᄒᆞ다가게여온모딘(민)댄드ᄂᆞᆫ갈ᄒᆞᆯ빗기자ᄇᆞ며쇠막대갓고로자바뿌(부)톄며外道ㅅ거ᄉᆡ精識ᄋᆞᆯ조히베티며涅槃이라혼거즛ᄆᆡᇰᄀᆞ론자ᄉᆞᆯ헤티리니긔ᅀᅡᄒᆞ오ᅀᅡ녀며ᄒᆞ오ᅀᅡ거러마ᄀᆞᆫ고디업순디라즐겁디아니ᄒᆞᆫ고대절로즐거온주리잇도다

佛敎

佛敎ㅣ라

부텻敎門이라

[요해]諸佛ㅅ玄機ㅣ與塵으로自異ᄒᆞ실ᄉᆡ故로於一塵中에轉大法輪ᄒᆞ시며以一圓音ᄋᆞ로曲順機宜ᄒᆞ샤미如春風이動地예千花萬卉ㅣ各自敷榮이니라

부텻玄妙ᄒᆞᆫ조각이世間과다ᄅᆞ실ᄉᆡᄒᆞᆫ듣글ᄭᅡ온ᄃᆡ큰法輪ᄋᆞᆯ펴시며_{ᄒᆞᆫ듣그ᄅᆞᆫᄆᆞᅀᆞ미오큰法輪ᄋᆞᆫ法이니一切法ᄋᆞᆯᄆᆞᅀᆞᆷ과가ᄌᆞᆯ비건댄ᄒᆞᆫ듣글마도몯ᄒᆞ건마ᄅᆞᆫ구틔여니ᄅᆞ노라ᄒᆞ야ᄒᆞᆫ듣그리라ᄒᆞ다輪ᄋᆞᆫ구을시니一切衆生ᄋᆡᄆᆞᅀᆞ매마ᄌᆞᆫ야ᇰᄌᆞ로구으러다大乘으로들에ᄒᆞᆯ시라}ᄒᆞᆫ圓音ᄋᆞ로_{圓音ᄋᆞᆫ三乘이저마다ᄀᆞ초듣ᄂᆞᆫ소ᄅᆡ라}子細히機예맛게니ᄅᆞ샤미보ᇝᄇᆞᄅᆞ미부러ᄃᆞᆫ가지가짓곳과플왜제곰펴두미ᄀᆞᆮᄒᆞ니라

三乘次第로演金言ᄒᆞ시니三世如來ㅣ亦共宣ᄒᆞ시니라

三乘次第로金ᄀᆞᆮᄐᆞᆫ마ᄅᆞᆯ베프시니三世옛뿌(부)톄ᄯᅩᄒᆞᆫ가지로베프시니라

[요해]縱饒一味無私ㅣ나奈緣根機ㅣ不同ᄒᆞᆯᄉᆡ故로佛如來ㅣ垂曲鈎於寒潭ᄒᆞ시며現劣身於道樹ᄒᆞ샤諦緣度等으로渡象馬兎ᄒᆞ시니言有次第ᄒᆞ나法無淺深이라如百鍊之金으로作甁盤釵釧ᄒᆞ야如是器噐斤兩ᄋᆞᆯ分明게ᄒᆞ고若人이將此噐ᄒᆞ야鎔成一塊金ᄒᆞ면錙銖도不減ᄒᆞ리니如一味平等法을對三根人ᄒᆞ샤次第宣揚ᄒᆞ시나其平等法은終無優劣ᄒᆞᆯᄉᆡ故로曰金言이니如是金言을非但現在佛이如是說이라十方三世一切諸佛이各於此時예同演一音ᄒᆞ시며同說是法ᄒᆞ샤刹說塵說이無有窮盡ᄒᆞ니爲什麽如此오無邊刹境自他ㅣ不隔於毫端오十世古今始終이不離於當念이니라

비록ᄒᆞᆫ마시私情업스시나젼혀根機同티아닐ᄉᆡ뿌(부)톄구븐낛ᄉᆞᆯᄎᆞᆫ소헤드리오시며_{구븐낛시라혼마ᄅᆞᆫ佛法이本來바ᄅᆞ거ᄂᆞᆯ衆生ᄋᆡ根機ㅣ다ᄅᆞᆯᄉᆡ야ᇰᄌᆡ야ᇰᄌᆞ로濟渡ᄒᆞ시노라말ᄉᆞ미여러가질ᄉᆡ구븐낛시라ᄒᆞ니라ᄎᆞᆫ소ᄒᆞᆫ비록衆生ᄋᆡ根機ㅣᅀᅡ여러가지나제本性ᄋᆞᆫ本來조하ᄒᆞᆫ믈ᄭᅧᆯ도니디아니ᄒᆞᆯᄉᆡᄎᆞᆫ모시라ᄒᆞ니라}사오나온모ᄆᆞᆯ菩提樹에나토샤四諦와十二因緣과六度와로象과ᄆᆞᆯ와톳기와ᄅᆞᆯ건네시니_{四諦ᄂᆞᆫᄒᆞ나ᄒᆞᆫ苦諦ㅣ니苦ᄂᆞᆫ受苦ᄒᆞᆯ시라受苦ㅣ세가지니셜워受苦와ᄒᆞ야디여受苦와서ᄅᆞ즐거오며어려오미두의힐호노라受苦ㅣ니天道로人世界예ᄀᆞ초잇ᄂᆞ니라둘ᄒᆞᆫ集諦ㅣ니몬졧苦諦로셔善惡두法을일울시라세ᄒᆞᆫ滅諦ㅣ니그런어려온이ᄅᆞᆯ업게ᄒᆞ고眞實ㅅ法을나툴시라네ᄒᆞᆫ道諦ㅣ니正道애닷가버서날시라이ᄂᆞᆫ聲聞ᄋᆡᄌᆡ죄라十二因緣ᄋᆞᆫᄒᆞ나ᄒᆞᆫ無明이니過去에智慧업서ᄇᆞᆰ디아니ᄒᆞᆯ시라둘ᄒᆞᆫ行이니ᄇᆞᆰ디아니ᄒᆞᆯᄉᆡ一切ㅅ됴ᄒᆞᆫ구즌業ᄋᆞᆯ지ᅀᆞᆯ시라세ᄒᆞᆫ識이니一切ㅅ業ᄋᆞᆯ지ᅀᅥ어버ᅀᆡᄇᆡ예들시라네ᄒᆞᆫ明色이니ᄆᆞᅀᆞᆷ과숨과이셔어버ᅀᆡᄇᆡ예드러얼굴도욀시라다ᄉᆞᄉᆞᆫ六入이니눈귀로셔ᄆᆞᅀᆞᆷᄭᆞ자ᇰ이러諸境ᄋᆞᆯ드릴시라여ᄉᆞ슨觸이니ᄇᆡ예나六塵에ᄆᆞᅀᆞᆷ다힐시라닐굽ᄋᆞᆫ受ㅣ니보ᄂᆞᆫ境에됴ᄒᆞ며구조ᄆᆞᆯ바ᄃᆞᆯ시라여ᄃᆞᆲᄋᆞᆫ愛ㅣ니고ᄋᆞᆫ것ᄉᆞ라ᇰᄒᆞᆯ시라아홉ᄋᆞᆫ取ㅣ니고ᄋᆞᆫ것가지고져ᄒᆞᆯ시라열ᄒᆞᆫ有ㅣ니아랫이리잇다호미니아ᄅᆡ일로이몸도ᄋᆡ여와ᄯᅩ後에일로아ᄅᆡᆺ야ᇰᄌᆡ그저이실시라열ᄒᆞ나ᄒᆞᆫ生이니이제이런사오나온因緣ᄆᆡᇰᄀᆞᆯᄉᆡ後제도이런모미도ᄋᆡ여날시라열둘ᄒᆞᆫ老死ㅣ니나면의식늘거주글시라이ᄀᆞ장셜온이리서ᄅᆞ니ᅀᅥ실ᄉᆡ十二因緣이라ᄒᆞᄂᆞ니이첫無明곳그ᄎᆞ면열둘히다업스릴ᄉᆡ緣覺이이고ᄃᆞᆯ업게호려ᄒᆞ온자뫼헤가셔닷ᄂᆞ니라六度ᄂᆞᆫᄒᆞ나ᄒᆞᆫ檀度ㅣ니布施ㅣ라그지업슨財寶내욤과妻子息이며몸ᄋᆞ로ᄂᆞᆷ줌과ᄆᆞᅀᆞᆷᄇᆞ료미ᅀᅡ큰布施ㅣ라둘ᄒᆞᆫ持戒ㅣ니쥬ᇰᄉᆡᇰ주굠과盜賊과色貪홈과거ᄌᆞ말와보핏말와모딘말와헌ᄉᆞ와貪心과瞋心과迷惑ᄒᆞᆫᄆᆞᅀᆞᆷ과ᄅᆞᆯ警誡ᄒᆞᆯ시라세ᄒᆞᆫ忍辱이니ᄂᆞ미나ᄅᆞᆯ辱도이ᄒᆞ야도ᄎᆞᄆᆞᆯ시라네ᄒᆞᆫ브즈러니佛法行할시라다ᄉᆞ슨禪定이니날숨들숨과몸과ᄆᆞᅀᆞᆷ과ᄀᆞ마니가져실시라여ᄉᆞ슨智慧ㅣ니智慧로왼ᄆᆞᅀᆞᄆᆞ로몬졧다ᄉᆞᆺ가짓이ᄅᆞᆯ子細히行ᄒᆞᆯ시라聲聞은受苦ᄅᆞᆯ슬히너겨涅槃애드로러(려)ᄒᆞᆯᄉᆡ佛法에녇고緣覺ᄋᆞᆫ無明인ᄆᆞᅀᆞᄆᆞᆯ그처涅槃애드로러(려)ᄒᆞᆯᄉᆡ佛法에中間ᄒᆞ고菩薩ᄋᆞᆯ몬져慈悲로衆生ᄋᆞᆯ에엿비너겨智慧로布施ᄒᆞ며持戒ᄒᆞ며忍辱ᄒᆞ며精進ᄒᆞ며參禪ᄒᆞ야우후로뿌(부)텻큰ᄆᆞᅀᆞᄆᆞᆯ받ᄌᆞᆸ고아래로衆生濟渡ᄒᆞᆯᄉᆡ佛法에기프니ᄒᆞᆫ가짓佛法에세희根機ㅣ달오미ᄒᆞᆫ가짓기픈므레톳기ᄂᆞᆫ우후로허여나고ᄆᆞᄅᆞᆫ가온ᄃᆡ만헤오象ᄋᆞᆫ믌소ᄀᆞᆯ다ᄇᆞᆯ와건넘ᄀᆞᆮᄒᆞ니라}말ᄉᆞ미次第ㅣ이시나法은녀ᄐᆞ며기푸미업순디라ᄀᆞ자ᇰ불욘金오로甁과盤과빈혀과ᄇᆞᆯ쇠와ᄆᆡᇰᄀᆞ라저올로子細히ᄃᆞᆯ오ᄯᅩ그거ᄉᆞᆯ노겨ᄒᆞᆫ무적金ᄋᆞᆯᄆᆡᇰᄀᆞᆯ먼(면)죠고매도더디아니ᄒᆞ리니ᄒᆞᆫ가짓平等한法을세가짓사ᄅᆞᆷᄃᆞ려次第로니ᄅᆞ시나그平等ᄒᆞᆫ法이노ᄑᆞ며사오나오미업숨ᄀᆞᆮᄒᆞᆯᄉᆡ金言이라ᄒᆞ니이런金言ᄋᆞᆯᄒᆞᆫ갓이젯뿌(부)톄니ᄅᆞ시논주리아니라十方三世一切諸佛이다이제ᄒᆞᆫ가지로ᄒᆞᆫ가짓소ᄅᆡᄅᆞᆯ펴시며ᄒᆞᆫ가지로이런法을니ᄅᆞ샤刹도니ᄅᆞ시며塵도니ᄅᆞ샤미_{刹ᄅᆞᆫ듣틀다ᄆᆞᆫ거시오듣트ᄅᆞᆫ刹ㅅ소개든거시니世界ㅣ刹이오衆生이塵이라}다ᄋᆞᆯ업스시니엣디그러뇨그지업슨𠛴境엣나와ᄂᆞᆷ괘터럭마도ᄀᆞ리디아니코열뉫녜와이제와처ᅀᅥᆷ과내죠ᇰ괘當念에여ᄒᆡ디아니ᄒᆞᆯᄉᆡ니라_{열뉘ᄂᆞᆫ現在로셔過去未來도ᄋᆡ오過去로셔現在未來도ᄋᆡ오未來로셔現在過去ㅣ도ᄋᆡ오거긔셔ᄃᆞᆫ니디아니ᄒᆞᄂᆞᆫ世모ᄃᆞ니十世ㅣ니녜ᄒᆞᆫ쥬ᇰ이太白山弥理嵓의셔華嚴ᄋᆞᆯ보더니ᄒᆞᆫ큰도티디나가거ᄂᆞᆯ뿌(부)텨ᄭᅴ저ᅀᆞᆸ고묻ᄌᆞ오ᄃᆡ엣디이러ᄒᆞ니잇고뿌(부)텨니ᄅᆞ샤ᄃᆡ그도ᄐᆞᆫ네아ᄅᆡᆺ모미오나ᄂᆞᆫ네未來옛뿌(부)톄로라ᄒᆞ야시ᄂᆞᆯ즉재그쥬ᇰ이아니라}

初說有空애人盡執이어ᄂᆞᆯ後非空有에衆皆捐ᄒᆞ도다

처ᅀᅥᄆᆡ잇다업다ᄒᆞ야닐어시ᄂᆞᆯ사ᄅᆞ미거긔ᄆᆡ옛거ᄂᆞᆯ後에업스며이쇼미아니라ᄒᆞ야시ᄂᆞᆯ모다다ᄇᆞ리도다

[요해]初住鹿苑ᄒᆞ샤說諦緣度等ᄒᆞ샤明因緣譬喩善惡報應이影響無差ᄒᆞ야시ᄂᆞᆯ窮子ㅣ無知ᄒᆞ야執爲實有ᄒᆞᆯᄉᆡ次說方等ᄒᆞ샤彈偏折小ᄒᆞ시며歎大褒圓ᄒᆞ시고次說般若ᄒᆞ샤談諸法空ᄒᆞ신대復著於空ᄒᆞ야不能脫体飜身ᄒᆞᆯᄉᆡ終至法華涅槃ᄒᆞ샤廢前空有方便ᄒᆞ시고成一乘妙ᄒᆞ신대於是예四衆이盡棄空有戱論之糞ᄒᆞ고同入圓融法性之海ᄒᆞ니故로法華經에云호ᄃᆡ諸佛이出於世ᄒᆞ샤但以假方便르로引道於衆生이라ᄒᆞ도다

처ᅀᅥᄆᆡ鹿苑에겨샤四諦와十二因緣과六度와니ᄅᆞ샤因緣과가ᄌᆞᆯ뵴과됴홈구조미ᄒᆞ나토어긔디아니ᄒᆞ니라닐어시ᄂᆞᆯ迷惑ᄒᆞᆫ사ᄅᆞ미몰라眞實로그러토다ᄒᆞᆯᄉᆡ버거方等ᄋᆞᆯ니ᄅᆞ샤偏ᄋᆞᆯ외다ᄒᆞ시며쟈그니ᄅᆞᆯ것그시고크니ᄅᆞᆯ기리시며ᄀᆞᄌᆞ니ᄅᆞᆯ襃揚ᄒᆞ시고_{偏ᄋᆞᆫ小乘ᄋᆡ因緣에깃거ᄒᆞᆯ시라小ᄂᆞᆫ有餘涅槃애드러깃거ᄒᆞᆯ시라大ᄂᆞᆫ六度애드러衆生濟渡ᄒᆞᆯ시라圓은衆生濟渡도ᄆᆞᅀᆞ매아니가져모로기衆生境界예드러濟渡ᄒᆞᆯ시라}버거般若ᄅᆞᆯ니ᄅᆞ샤一切法이업스니라닐어시ᄂᆞᆯᄯᅩ업다호매브터훤츠리버서나디몯ᄒᆞᆯᄉᆡ내죵애法華経涅槃経에가샤아ᄅᆡᆺ업다잇다혼方便ᄋᆞᆯᄇᆞ리시고一乘微妙ᄒᆞᆫ法門ᄋᆞᆯ닐어시ᄂᆞᆯ그제ᅀᅡ모다아ᄅᆡᆺ弄談ᄒᆞ던더러온마ᄅᆞᆯ더디고다ᄒᆞᆫ가진法性바ᄅᆞ래드니그런젼ᄎᆞ로法華経에닐오ᄃᆡ뿌(부)톄世間애나샤假借혼方便ᄋᆞ로衆生ᄋᆞᆯ濟渡ᄒᆞ시니라

龍宮滿藏ᄋᆞᆫ醫方義오鶴樹終談애理未玄ᄒᆞ도다

龍宮에ᄀᆞᄃᆞ기녀허잇ᄂᆞᆫ거ᄉᆞᆫ藥ᄒᆞᄂᆞᆫᄠᅳ디오鶴樹ㅅ내죠ᇰ말ᄉᆞ매理ㅣ玄妙티몯ᄒᆞ도다

[요해]龍宮者ᄂᆞᆫ華嚴經䟽애云호ᄃᆡ文殊ㅣ與阿難海로結集法藏於鐵圍山間ᄒᆞ야收入龍宮ᄒᆞ다佛滅度後六百餘年에龍樹菩薩이徃龍宮ᄒᆞ야見華嚴大經이凡有三本이어ᄂᆞᆯ上中二本ᄋᆞᆫ文義浩愽ᄒᆞ야非力所持ㄹᄉᆡ遂誦出下本ᄒᆞ야流布西域ᄒᆞ니而中國所傳ᄋᆞᆫ止三十九品이라滿藏者ᄂᆞᆫ涅槃經에云호ᄃᆡ譬如長者ㅣ唯有一子ᄒᆞ더니心常愛念ᄒᆞ야將詣明師ᄒᆞ야懼不速成일가ᄒᆞ야尋便將還ᄒᆞ야以愛念故로晝夜애殷勤ᄒᆞ야但敎半字ᄒᆞ고而不敎滿字ᄒᆞ니良由其子이力未堪故ㅣ니라半字ᄂᆞᆫ卽小乘九部오滿字ᄂᆞᆫ即大乘十二部ㅣ니라醫方義者ᄂᆞᆫ衆生이貪恚痴病ᄋᆞᆯ不能差瘳ᄒᆞᆯᄉᆡ故로佛이但因病ᄒᆞ샤施藥耳시니且受病이旣殊ㅣ라施方이亦異ᄒᆞ샤至於十二部ㅣ汗漫浩瀚ᄒᆞ야非佛本義실ᄉᆡ故로終至涅槃會上ᄒᆞ샤掃盡本懷ᄒᆞ시고普集大衆ᄒᆞ샤而告之言ᄒᆞ샤ᄃᆡ自從鹿野苑으로終至跋提河히於是二中間애未曾說一字호라ᄒᆞ시니是之謂終談이라鶴樹ㅣ라云者ᄂᆞᆫ世尊이臨入涅槃ᄒᆞ샤詣娑羅樹ᄒᆞ시니其樹ㅣ垂覆寶床ᄒᆞ야慘然變白ᄒᆞ니如鶴色ᄒᆞᆯᄉᆡ故로曰鶴樹ㅣ라理未玄者ᄂᆞᆫ雖然如是ㅣ나世尊이於終談애作如是語ᄒᆞ시니已落第二機ㅣ라非向上玄機ㅣ니如何是向上玄機오父母所生口로終不爲人傳호리라

龍宮이라혼마ᄅᆞᆫ華嚴經䟽애닐어쇼ᄃᆡ文殊ㅣ阿難과뿌텨니ᄅᆞ샨마ᄅᆞᆯ鐵圍山間애가ᄆᆡᇰᄀᆞᄅᆞ샤_{鐵圍山은무쇠로둘엣ᄂᆞᆫ뫼히라}조히주ᅀᅥ龍宮에녀ᄒᆞ시다_{이ᄂᆞᆫ末世에(예)스ᇰ이쥬ᇰ도ᄋᆡ여正因ᄋᆞᆯ그ᄅᆞᄆᆡᇰᄀᆞᆯ가ᄒᆞ시니라}뿌(부)텨업스신六百年에龍樹菩薩이龍宮애가샤華嚴大経ᄋᆞᆯ보시니세가지어ᄂᆞᆯ上中二本ᄋᆞᆫᄠᅳ디하넙고할ᄉᆡ힘오로몯가져올거실ᄉᆡ下本ᄋᆞᆯ외오샤西域에가져오시니_{그數ᄂᆞᆫ十萬四十八品이라}江南오니ᄂᆞᆫ三十九品이라滿藏ᄋᆞᆫ涅槃経애닐오ᄃᆡ가ᄌᆞᆯ비건댄長者ㅣᄒᆞᆫ아ᄃᆞᄅᆞᆯ뒷더니하어엿비너겨어딘스스ᇰ의손ᄃᆡ보내요려호ᄃᆡᄲᆞᆯ리어디디몯ᄒᆞᆯ가저허즉채오라ᄒᆞ야어엿비너기논젼ᄎᆞ로밤나ᄌᆡ브즈러니半字ᄅᆞᆯ싀이고ᄀᆞᄌᆞᆫ字ᄅᆞᆯ아니싀이니젼혀그아ᄃᆞ리히미맛디몯ᄒᆞᆯᄉᆡ니라_{아ᄒᆡᄅᆞᆯ하ᄂᆞᆯ天字ᄅᆞᆯᄀᆞᄅᆞ쵸ᄃᆡᄒᆞᆫ一字ᄅᆞᆯ니기싀이고버거큰大字ᄅᆞᆯ싀여ᄀᆞᄅᆞ치면하ᄂᆞᆯ天字ㅣ라}半字ᄂᆞᆫ小乘ᄋᆡ九部ㅣ오滿字ᄂᆞᆫ大乘ᄋᆡ十二部ㅣ라_{十二部ᄂᆞᆫ一ᄋᆞᆫ修多羅ㅣ니예셔닐오맨法本이라二ᄂᆞᆫ祇夜ㅣ니예셔닐오맨重頌이라三ᄋᆞᆫ和伽羅那ㅣ니예셔닐오맨授記ㅣ라四ᄂᆞᆫ伽陀ㅣ니예셔닐오맨孤起偈ㅣ라五ᄂᆞᆫ優陀羅ㅣ니예셔닐오맨無問而自說이라六ᄋᆞᆫ尼陀那ㅣ니예셔닐오매ᄂᆞᆫ因緣이라七ᄋᆞᆫ阿波陀那ㅣ니예셔닐오맨譬喩ㅣ라八ᄋᆞᆫ伊帝目多伽ㅣ니예셔닐오맨本事ㅣ라九ᄂᆞᆫ闍陀伽ㅣ니예셔닐오맨本生이라十ᄋᆞᆫ毗佛略이니예셔닐오맨方廣이라十一ᄋᆞᆫ阿浮陀達摩ㅣ니예셔닐오맨未曾有ㅣ라十二ᄂᆞᆫ優波提舍ㅣ니예셔닐오맨論義ㅣ라九部ᄂᆞᆫ因緣과譬喩과論義과ᄅᆞᆯ덜면九部ㅣ니大乘ᄋᆞᆫᄆᆞᅀᆞ미ᄂᆞᆯ카올ᄉᆡ十二部ㅣ라도알려니와小乘ᄋᆞᆫᄆᆞᅀᆞ미鈍ᄒᆞᆯᄉᆡ九部만ᄀᆞᄅᆞ쳐有餘涅槃에들에호려ᄒᆞ샨ᄠᅳ디라}醫方義ᄂᆞᆫ衆生이貪心과瞋心과迷惑ᄒᆞᆫᄆᆞᅀᆞᄆᆞᆯ가진病ᄋᆞᆯ됴티몯ᄒᆞᆯᄉᆡ뿌(부)톄病ᄋᆞᆯ因ᄒᆞ샤藥ᄋᆞᆯ주실ᄲᅮᆫ이니病이제곰다ᄅᆞᆯᄉᆡ藥주샴도다ᄅᆞ샤十二部ㅣ도록어즈러워뿌(부)텻ᄠᅳ디아니실ᄉᆡ내죠ᇰ애涅槃會上애오샤조히가ᄉᆞ맷거ᄉᆞᆯᄡᅳ러더디시고모ᄃᆞᆫ사ᄅᆞᆷ오라ᄒᆞ샤니ᄅᆞ샤ᄃᆡ鹿野苑ᄋᆞ로브터跋提河애니ᄅᆞ리이두ᄉᆞᅀᅵ예ᄒᆞᆫ말도아니닐오라ᄒᆞ시니이내죠ᇰ마리라_{鹿野苑ᄋᆞᆫ처ᅀᅥᆷ說法하신ᄯᅡ히오跋提河ᄂᆞᆫ내죠ᇰ업스신ᄯᅡ히라}鶴樹ㅣ라닐오ᄆᆞᆫ世尊이업스실제娑羅ㅣ라혼즘게예가시니그즘게七寶床애더펴셔슬픈ᄆᆞᅀᆞᄆᆞ로조히셰여鶴ᄋᆡ빗ᄀᆞᆮᄒᆞᆯᄉᆡ鶴樹ㅣ라ᄒᆞ다理ㅣ玄妙티몯다호ᄆᆞᆫ비록佛法이그러ᄒᆞ나世尊이내죠ᇰ말ᄉᆞ매이리니ᄅᆞ시니_{모ᄃᆞᆫ사ᄅᆞᆷ오라ᄒᆞ샤니ᄅᆞ샨마리라}ᄇᆞᆯ셔둘잿조각애디야ᄆᆞᆺ웃玄妙한조각이안이니어늬ᄆᆞᆺ웃玄妙ᄒᆞᆫ조각고어버ᅀᅵ나혼이부로내죠ᇰ내ᄂᆞᆷᄃᆞ려니ᄅᆞ디아니호리라

眞淨界中에纔一念이면閻浮에早已八千年이니라

眞實ㅅ조ᄒᆞᆫ世界ㅅ가온ᄃᆡᄒᆞᆫ念이나ᄒᆞ면閻浮提예ᄇᆞᆯ셔八千年이도ᄋᆡ리라

[요해]眞則不妄이오淨則不染이니圓明無礙ᄒᆞ야了了如空이라於此界中에瞥生一念이면閻浮提裏예千生萬刦이리니故로牛頭融이謂智閑云호ᄃᆡ一塵이飛而翳天이오一芥ㅣ墮而覆地ㅣ라ᄒᆞ도다閻浮ᄂᆞᆫ此云勝金이라

眞實이면거즛거시아니오조ᄒᆞ면더럽디아니ᄒᆞ니ᄀᆞᆺ고ᄇᆞᆯ가ᄀᆞ료미업서ᄆᆞᆯᄀᆞᆺᄆᆞᆯᄀᆞᆺᄒᆞ야업슨ᄃᆞᆺ혼디라이고대어ᄅᆞᄉᆞᆫᄒᆞᆫ念이나내면閻浮提예千生萬刦이도외리니牛頭融이智閑ᄃᆞ려니ᄅᆞ샤ᄃᆡᄒᆞᆫ드트리ᄂᆞ라하ᄂᆞᆯᄒᆞᆯᄀᆞ리오고ᄒᆞᆫ芥子ㅣ디여ᄯᅡᄒᆞᆯ두피ᄂᆞ니라閻浮ᄂᆞᆫ예셔닐오맨됴ᄒᆞᆫ金이라

還鄕曲

還鄕曲이라

本鄕ᄋᆞ로도라가ᄂᆞᆫ놀애라_{本鄕ᄋᆞᆫ無生境界ㅣ라}

勿於中路애事空王ᄒᆞ고策杖ᄒᆞ야咸須達本鄕ᄒᆞ라

가온ᄃᆡᆺ길헤뷘님구ᄆᆞᆯ셤기디말오막대디퍼다本鄕ᄋᆞ로ᄉᆞᄆᆞ차가라

[요해]說妙談玄도猶是中路ㅣ며趣向菩提도即事空王이니大凡ᄒᆞᆫ디學人이橫拈柱杖ᄒᆞ며倒握吹毛ᄒᆞ야牙如劒樹ᄒᆞ며口似血盆ᄒᆞ야佛祖性命ᄋᆞᆯ一刀애截斷ᄒᆞ야도猶是鈍漢이온況掠虛摸空ᄒᆞ야佇思停機ㅣᄯᆞ녀所以道호ᄃᆡ登山須到頂이오入海須到底ㅣ니라

微妙ᄒᆞᆫ말니ᄅᆞ며玄妙ᄒᆞᆫ말도올히려가온ᄃᆡᆺ길히며_{가온ᄃᆡᆺ길ᄒᆞᆫ本鄕애몯갯ᄂᆞᆫᄉᆞᅀᅵ라}菩提예나ᅀᅡ감도곧뷘님굼셤교미니大凡ᄒᆞᆫ디ᄇᆡ홀사ᄅᆞ미막대빗기자ᄇᆞ며吹毛釼ᄋᆞᆯ갓고로자바_{吹毛釼ᄋᆞᆫ터리ᄅᆞᆯᄂᆞᆯ해다히고부러ᄃᆞᆫ벋ᄂᆞᆫ갈히니學人이一切情量ᄋᆞᆯ그야ᇰᄌᆞ로베텨ᅀᅡ受用이올ᄂᆞ니라}어미갈즘게ᄀᆞᆮᄒᆞ며이비핏도ᇰᄒᆡᄀᆞᆮᄒᆞ야_{이ᄂᆞᆫᄆᆞᅀᆞ미世間ㅅ情量애업닷마리라}뿌(부)텨와祖師ㅅ목수ᄆᆞᆯᄒᆞᆫ갈해베텨도올히려鈍ᄒᆞᆫ모디온ᄒᆞᄆᆞᆯ며업슨것아ᅀᆞ며虛空자바ᄠᅳᆮ머추며조각ᄋᆞᆯ두미ᄯᆞ녀그럴ᄉᆡ닐오ᄃᆡ뫼헤올올덴(뎬)모로매수ᄂᆞᆯ개오ᄅᆞ고바ᄅᆞ래드롤덴(뎬)모로매ᄆᆞᆺ며(미)ᄐᆡ갈디니라

雲水隔時예君莫住ᄒᆞ라雪山深處에我非忙호라

구룸과믈와ᄀᆞ린ᄃᆡ그ᄃᆡ잇디말라눈딘뫼기픈ᄃᆡ내밧ᄇᆞ디아니호라

[요해]一切語言知見聖賢位次ᄅᆞᆯ謂之雲水ㅣ오如是諸法情量見解ᄅᆞᆯ蕩盡無餘ᄒᆞ야一色이全彰ᄒᆞ야無可比方ᄋᆞᆯ謂之雪山이니聖賢位次ᅟᅵᆫ妙語玄談애君莫停機ㅣ어다一色이孤危ᄒᆞ야魔外ㅣ難窺ᄒᆞ야得到大休歇田地라도我亦不肯호리라所以道호ᄃᆡ依倚一物이면便不中이라ᄒᆞ도다

一切ㅅ말ᄉᆞᆷ과見解와聖賢位次ᄅᆞᆯ구룸과믈왜라ᄒᆞ고_{구룸믈와ᄂᆞᆫᄭᅥᆲ닷마리라}이러ᄐᆞᆺᄒᆞᆫ諸法情量見解ᄅᆞᆯ조히ᄡᅳ러더뎌나ᄆᆞᆫ거시업게ᄒᆞ야ᄒᆞᆫ비치젼혀나타가ᄌᆞᆯ빌ᄯᅡ히업수ᄆᆞᆯ눈딘뫼히라ᄒᆞᄂᆞ니_{눈딘뫼ᄒᆞᆫ싁싁ᄒᆞᆯ시라}聖賢位次ᅟᅵᆫ微妙ᄒᆞᆫ말와玄微ᄒᆞᆫ마래그ᄃᆡ조각ᄋᆞᆯ두디마롤디어다ᄒᆞᆫ비치孤絶코어려워外道ㅅ거시엿우디몯ᄒᆞ야ᄀᆞ자ᇰ쉴ᄯᅡ해갈디라도내즐기디아니호리라그럴ᄉᆡ닐오ᄃᆡᄒᆞᆫ거ᄉᆡ븓들이면맛디아니ᄒᆞ리라

堪嗟去日레顔如玉이러니却歎廻來예鬢似霜이로다

슬험직ᄒᆞ다갈나랜야ᇰᄌᆡ졈더니애ᄃᆞᆲ다올젠귀미티셰도다

[요해]始悟眞源ᄒᆞᆯᄉᆡᆫ宛是初機러니及乎悟了ᄒᆞ얀方知本具ㅣ로다白髮小兒ㅣ初成正覺ᄒᆞ고小兒白髮이轉妙法輪이로다法華經애云호ᄃᆡ佛이出釋氏宮ᄒᆞ샤去伽耶ㅣ不遠ᄒᆞ샤坐於道場ᄒᆞ샤得阿耨菩提ᄒᆞ시니然이나成佛已來ㅣ無量百千億那由他刦이라ᄒᆞ니爲什麽如是오古之今之며今之古之로다

비ᄅᆞ서眞實ㅅ根源ᄋᆞᆯ아로려ᄒᆞᆯ젠젼혀첫根機ㅣ러니조히아라ᄂᆞᆫ젼혀本來ᄀᆞ잿도다머리셴아기처ᅀᅥᆷ뿌(부)텨도외오아기머리셰니法ᄋᆞᆯ펴도다法華經에닐오ᄃᆡ뿌(부)톄釋氏ㅅ王宮에나샤伽耶城버ᇰ으로미머디아니ᄒᆞ샤道場애안ᄌᆞ샤阿耨菩提ᄅᆞᆯ어ᄃᆞ시니_{阿耨菩提ᄂᆞᆫ뿌(부)텨도ᄋᆡ닷마리라}그러나뿌(부)텨ᄃᆞ외여신디無量百千億那由他刦이라ᄒᆞ니엣디이러ᄒᆞ뇨녜이제며이제녜로다

撒手ᄒᆞ야到家ᄅᆞᆯ人不識ᄒᆞᄂᆞ니更無一物도獻尊堂이로다

쏜(손)ᄠᅥ러지ᄇᆡ가ᄆᆞᆯ사ᄅᆞ미아디몯ᄒᆞᄂᆞ니다시ᄒᆞᆫ것도아바님ᄭᅴ받ᄌᆞ올거시업도다

[요해]所得諸法이盡是摸空捉影이며所到家鄕이無非撮電捫風이로다紅顔老爺ᄅᆞᆯ將何奉獻고雲山海月로爲他供ᄒᆞ며無底盃盂로獻壽觴호리라

어돈모ᄃᆞᆫ法이다虛空자ᄇᆞ며그르메자본거시며간本鄕이번게쥐며ᄇᆞᄅᆞᆷ잡ᄃᆞᆺ호미아닔아니로다져믄늘근아비ᄅᆞᆯ므스거ᄉᆞᆯ받ᄌᆞ오뇨구룸과뫼콰바ᄅᆞᆯ와ᄃᆞᆯ오로供養ᄋᆞᆯ사ᄆᆞ며믿업슨잔과바리로獻壽호리라

破還鄕曲

破還鄕曲이라

本鄕애가ᄆᆞᆯ헌놀애라

返本還源이事亦差ᄒᆞ니本來無住ㅣ라不名家ㅣ로다

本鄕애도라가며根源에도라가려혼일도ᄯᅩ외니本來이숄ᄯᅡ히업손디라지비랏일훔도몯ᄒᆞ리로다

[요해]擬欲還家ᄒᆞ야南鄰北舍애結鷄豚社ᄒᆞ야唱巴歌ᄒᆞ고中村醪慶快平生ᄒᆞ다니及乎到家ᄒᆞ얀無地可托이로다從前錯計런抛在一邊이어니와如何是今時예無肯底消息고家破人亡ᄒᆞ야音信斷ᄒᆞ니空餘明月옷照梨花ㅣ로다

너교ᄃᆡ지ᄇᆡ도라가앏이옷뒷집ᄒᆞ야鷄豚社ᄅᆞᆯ무ᅀᅥ_{鷄豚社ᄂᆞᆫ스골사ᄅᆞᄆᆡ香徒ᄀᆞᆮᄒᆞᆫ거시라}샤ᇰ놀애브ᄅᆞ고스곬濁酒醉ᄒᆞ야平生ᄋᆞᆯ즐거이노로려ᄒᆞ다니지ᄇᆡ가ᄂᆞᆫ依據홀ᄯᅡ히업도다아ᄅᆡᆺ그ᄅᆞ혜던혜요ᄆᆞ런ᄒᆞᆫ녀긔ᄇᆞ리려니와어늬이제즐겁디아니ᄒᆞᆫ앗고집헐오사ᄅᆞᆷ업서소ᄅᆡ그ᄎᆞ니쇽졀업슨ᄃᆞᆯ옷ᄇᆡᆺ고ᄌᆡ비취옛도다

萬年松徑엔雪深覆ᄒᆞ고一帶峰巒앤雲更遮ㅣ로다

萬年솘길헨눈이기피더폣고두ᄅᆞᆫ묏부리옌구루미ᄯᅩᄀᆞ리옛도다

[요해]旣離這邊ᄒᆞ야生死已斷ᄒᆞ고又到那邊ᄒᆞ니涅槃이如夢이로다進步無門이오退身無路ㅣ라可謂雪深百尺ᄒᆞᆫ松徑이犖确이오雲遮萬重ᄒᆞᆫ層巒이崒嵂이로다到這裏ᄒᆞ얀十聖三賢도望崖而退이니五果四向이ᅀᅡ那聽音耗ㅣ리오且道ᄒᆞ라如何是境고自是不歸언뎌ᇰ歸便得ᄒᆞ리니五湖烟景ᄋᆞᆯ有誰爭고

ᄒᆞ마이곧여ᄒᆞ야살며주고미ᄒᆞ마긋고ᄯᅩ뎌고대가니涅槃이ᄭᅮᆷᄀᆞᆮ도다_{涅槃ᄋᆞᆫ西天마리니예셔닐오맨圓寂이라德이아니ᄀᆞ좀업슬ᄉᆞᆯ圓이오障礙아니다옴업슬ᄉᆞᆯ寂이니小乘ᄋᆞᆫ涅槃애가면ᄒᆞ마다가도다ᄒᆞᆯᄉᆡ有餘涅槃이오뿌(부)텨ᄂᆞᆫ이涅槃이眞實이아닌주ᄅᆞᆯ아ᄅᆞ실ᄉᆡ無餘涅槃이라}나ᅀᅡ갈門도업고믈러올길히업순디라어로닐오ᄃᆡ눈一百자기픈솘길히어렵고구룸一百ᄇᆞᆯᄀᆞ린層層인묏부리놉도다이고대다ᄃᆞ란十聖三賢도비ᇰ애ᄅᆞᆯᄇᆞ라고믈러나거니五果四向이ᅀᅡ어느소ᄅᆡᆫᄃᆞᆯ드ᄅᆞ리오니ᄅᆞ라어늬그곧고젼혀아니가란ᄃᆡ만뎌ᇰ가면보리니五湖ㅅ景体ᄅᆞᆯ뉘ᄃᆞ토리오

賓主穆時도純是妄이오君臣合處도正中邪ㅣ로다

손과主人괘서ᄅᆞᄆᆞᅀᆞᆷ이대가죰도젼혀거ᄌᆞᆽ이리오님굼과臣下와마ᄌᆞᆫ곧도正ᄒᆞᆫ中엣邪法이로다

[요해]賔主ㅣ雍和ᄒᆞ며君臣이際會호미即是當家앳標格이니然而向上一著ᄋᆞᆫ千聖이不立이라當機薦取ᄒᆞ야도早是錯了ㅣ니畢竟에作麽生是不妄不邪底風光고擬欲與君ᄋᆞ로閑說夢이언마ᄅᆞᆫ恐君이傳話ᄒᆞ야落人間일가ᄒᆞ노라

손과主人과和同ᄒᆞ며_{손ᄋᆞᆫ偏位ㅣ니事門에내ᄃᆞᄅᆞᆫᄯᅡ히오主人ᄋᆞᆫ正位ㅣ니젼혀事門에나디아니ᄒᆞᆫ고디라事門과理門괘서ᄅᆞ回互ᄒᆞ야맛ᄃᆞᆮ디아니ᄒᆞ야ᅀᅡ眞實ㅅ맛ᄃᆞ로미라}님굼과臣下와맛ᄃᆞ로미곧그고댓格式이니_{님굼ᄋᆞᆫ尊貴ᄒᆞᆫ고디니正位ㅣ라臣下ᄂᆞᆫ第二機ㅣ니偏位ㅣ라님구미貴ᄒᆞ시나져젯거리예맛보ᅀᆞ와ᅀᅡ正ᄒᆞᆫ님구미시고臣下ㅣ니이리ᄒᆞ야님굼과臣下왜내로랏ᄆᆞᅀᆞ미업서ᅀᅡ正ᄒᆞᆫ고디라}그러나ᄆᆞᆺ웃ᄒᆞᆫ고ᄃᆞᆫ一千聖人이셔디몯홀디라그고대아라도ᄇᆞᆯ셔외니내죠ᇰ애어느고디마ᇰ랴ᇰᄃᆞ외디아니ᄒᆞ며邪티아니ᄒᆞᆫ곧고너교ᄃᆡ그ᄃᆡᄃᆞ려쇽졀업시ᄭᅮᆷ엣마ᄅᆞᆯ니ᄅᆞ고져ᄒᆞ간마ᄅᆞᆫ그듸이말傳ᄒᆞ야人間애펼가전로라

還鄕曲調를如何唱고明月堂前에枯木華로다

本鄕애도라가ᄂᆞᆫ놀애ᄅᆞᆯ엣디브ᄅᆞ리오ᄃᆞᆯᄇᆞᆯᄀᆞᆫ집알ᄑᆡ이온남긧고지로다

[요해]還鄕曲調ㅣ不屬宮商이어니那被管弦이리오要使石女로彈箏ᄒᆞ며木人ᄋᆞ로敲柏ᄒᆞ야唱出明月堂前에九夏煩蒸이오枯木枝頭에千花ㅣ爛熳이로다

本鄕애도라가ᄂᆞᆫ놀애宮商애븓디아니커니_{宮商ᄋᆞᆫ五音이라}어느뎌콰비화애올이리오모로매돌겨집ᄋᆞ로箏ᄩᆞ이고_{箏ᄋᆞᆫ풍륫가시라}나모사ᄅᆞᄆᆞ로ᄇᆡᆨ티여블로ᄃᆡᄃᆞᆯᄇᆞᆯᄀᆞᆫ집앏ᄑᆡ녀ᄅᆞ미덥고이온나못가지예고지헤드렛도다

廻機

廻機ㅣ라

조각ᄋᆞᆯ도ᄅᆞ다

[요해]洞山이云호ᄃᆡ機不離位ㅣ면墮在毒(海)ㅣ라ᄒᆞ니知有那邊消息ᄒᆞ고便須捨却ᄒᆞ야如金翅鳥ㅣ飛騰虛空ᄒᆞ야自在翶翔호ᄃᆡ而不墮落ᄒᆞ며雖依空以戱ᄒᆞ나而不據空ᄒᆞ야亦不爲空之所拘礙ᄒᆞ야ᅀᅡ名曰廻機ㅣ라

洞山이닐오ᄃᆡ조각ᄋᆞᆯ位예여ᄒᆡ디아니ᄒᆞ면모딘바ᄅᆞ래디리라ᄒᆞ니뎌고댓아ᄎᆞᆯ알오즉재모로매ᄇᆞ려金翅鳥ㅣ虛空애ᄂᆞ라自在히노녀ᄠᅥ러디디아니ᄒᆞ며비록虛空ᄋᆞᆯ依據ᄒᆞ나虛空애依據티아니ᄒᆞ야ᄯᅩ虛空애ᄀᆞ료미ᄃᆞ외디아니홈ᄀᆞᆮᄒᆞ야ᅀᅡ일후ᄆᆞᆯ조각도ᄅᆞ다ᄒᆞᄂᆞ니라

涅槃城裏ㅣ도尙猶危어ᄂᆞᆯ驀路相逢이沒了期ㅣ로다

涅槃城ㅅ소개도오히려어렵거ᄂᆞᆯ믄득길헤서ᄅᆞ맛보미젼혀긔역이업도다

[요해]經애云호ᄃᆡ如來ㅣ以方便力ᄋᆞ로化作一城ᄒᆞ야導諸疲衆ᄒᆞ샤而告之言ᄒᆞ샤ᄃᆡ今此大城에可於中止ᄒᆞ리니若入是城ᄒᆞ면快得安隱ᄒᆞ리라若能前至寶所ᄒᆞ면亦可得去ᄒᆞ리라ᄒᆞ시니是知호리라如來ㅣ權設涅槃ᄒᆞ샤以待下劣이어시뎌ᇰ非實有涅槃이可以休歇之場일ᄉᆡ故로危也ㅣ니危ᄂᆞᆫ不可久住也ㅣ라上句ᄂᆞᆫ不住涅槃也ㅣ오下句ᄂᆞᆫ言不住尊貴位ᄒᆞ니故로閙市예相逢ᄒᆞ야도無有㝎期ㅣ니言亦不住生死ᄒᆞ니二邊에不住ㅣ어니中道애那捿ㅣ리오所以廻機也ㅣ라恁麽則向什麽處ᄒᆞ야安身고陋巷애不騎金色馬ㅣ라行於異類ᄒᆞ야且輪廻니라

經에닐오ᄃᆡ뿌(부)톄方便힘ᄋᆞ로어려온길헤ᄒᆞᆫ자ᄉᆞᆯᄆᆡᇰᄀᆞ라ᄀᆞᆺᄇᆞᆫ사ᄅᆞᄆᆞᆯ引導호리라ᄒᆞ샤告ᄒᆞ야니ᄅᆞ샤ᄃᆡ이큰자새어로쉬리니이자새들면ᄀᆞ장便安ᄒᆞ리라ᄒᆞ다가앏보ᄇᆡ잇ᄂᆞᆫᄯᅡ해가면ᄯᅩ어로수이가리라ᄒᆞ시니그럴ᄉᆡ뿌톄부러涅槃ᄋᆞᆯᄆᆡᇰᄀᆞᄅᆞ샤下劣根機ᄅᆞᆯ기ᄃᆞᆯ오시건뎌ᇰ眞實로涅槃이어로쉴ᄯᅡ히아닐ᄉᆡ어럽(렵)다ᄒᆞ니어럽(렵)다호ᄆᆞᆫ오래잇디몯ᄒᆞᆯᄯᅡ히라웃句ᄂᆞᆫ涅槃애잇디아니탓마리오아랫句ᄂᆞᆫ尊貴ᄒᆞᆫ位예잇디아니타호미니그럴ᄉᆡ져젯가온ᄃᆡ맛봄도一定ᄒᆞᆫ긔역이업다ᄒᆞ니ᄯᅩ주그며살며호매잇디아니ᄒᆞ니두고대잇디아니커니中道애엣디이시리오그럴ᄉᆡ조각돌오미라이러면어느고대모ᄆᆞᆯ두리오더러온지ᄇᆡ金色ᄆᆞᄅᆞᆯᄐᆞ디몯ᄒᆞ야다ᄅᆞᆫ類에ᄃᆞᆫ녀輪迴ᄒᆞᄂᆞ니라

權掛垢衣를云是佛이어니와却裝珎御런復名誰오珎

부러더러온옷ᄉᆞᆯ니브니란뿌(부)톄라ᄒᆞ려니와곧보ᄇᆡᆺ옷니브니란ᄯᅩ누리라ᄒᆞ리오

[요해]拖泥帶水者런假立名狀이라已許尊貴ㅣ어니와其迢迢金殿에長年不出者런作什麽名狀고且道ᄒᆞ라名狀底是佛耶아沒名狀底是佛耶아佛之一字ᄅᆞᆯ吾不喜聞ᄒᆞ노라

ᄒᆞᆰᄭᅳᅀᆞ며믈가지니란假借ᄒᆞ야얼구리이숀디라ᄒᆞ마尊貴타ᄒᆞ려니와그먼金殿에長年에나디아니니란므스기라일훔ᄒᆞ리오니ᄅᆞ라일훔ᄒᆞ리뿌(부)텨아일훔몯ᄒᆞ리뿌(부)텨아뿌(부)텨라혼ᄒᆞᆫ字ᄅᆞᆯ내깃거몯듣노라

木人이夜半애穿靴去ᄒᆞ고石女ㅣ天明에戴帽歸로다

나모사ᄅᆞ미밤ᄯᅲᇰ에훠시너가고돌겨지비새배곳갈쓰고가도다

[요해]此ᄂᆞᆫ無語中에有語也ㅣ라雖不可名狀이나而大機大用이煥然呈露ᄒᆞ야有不可藏匿者ᄒᆞ니如云호ᄃᆡ泥牛ㅣ含月去ᄒᆞ고木馬ㅣ火中嘶로다

이ᄂᆞᆫ말ᄉᆞᆷ업슨듀ᇰ에말ᄉᆞᆷ이쇼미라비록수이일훔몯지ᄒᆞ나큰조각과큰用이번ᄃᆞ시나타수이갊디몯ᄒᆞ리니닐오ᄃᆡᄒᆞᆰᄉᆈᄃᆞᄅᆞᆯ므러가며나모ᄆᆞ리븘가온ᄃᆡ우다ᄐᆞᆺᄒᆞ니라

萬古碧潭애空界月를再三撈摝ᄒᆞ야ᅀᅡ始應知아

오란프른모새虛空앳ᄃᆞᄅᆞᆯ다시곰세번거려ᅀᅡ비르서알리아

[요해]郎月ㅣ懸空ᄒᆞ야下照澄潭ᄒᆞ야萬古千秋에宛然如昨이어니何必再三撈摝而後어ᅀᅡ知乎리오以喩大機大用인杷柄이在手ᄒᆞ야橫拈倒用애無有不是ᄒᆞ니廻機轉位도猶是兒戱로다

ᄇᆞᆯᄀᆞᆫᄃᆞ리虛空애ᄃᆞᆯ여ᄆᆞᆯᄀᆞᆫ모새비취여萬古千秋애젼혀어제ᄀᆞᆮᄒᆞ야잇거니엣디구ᄐᆡ여다시세번거린後에ᅀᅡ알리오큰조각과큰用인ᄌᆞᆯ이소내이셔빗기자ᄇᆞ며갓고로ᄡᅳ매왼ᄯᅡ히업스니조각돌옴과位(ㅣ)올몸도오히려아ᄒᆡ노ᄅᆞ시로다_{넷(녯)註에닐오ᄃᆡ學人이虛空ᄋᆞᆯ잡디말오모로매子細히ᄒᆞ라ᄒᆞ니큰ᄠᅳ데맛다커니와맛디아니타}

轉位歸

轉位歸ㅣ라

位ᄅᆞᆯ올마도라가다

旣能廻機라도須當轉位니라機者ᄂᆞᆫ始發之名이니至於轉位ᄒᆞ면則眞機ㅣ已發ᄒᆞ야橫拈倒用ᄒᆞ며逆順縱橫ᄒᆞ며東湧西沒ᄒᆞ야一放一收에大用이現前ᄒᆞ야不存軌則ᄒᆞ야有時예如踞地師子ᄒᆞ며有時예如金剛寶劒ᄒᆞ며有時예坐斷千差ᄒᆞ며有時예隨波逐浪ᄒᆞ리니如何境界오咄

ᄒᆞ마수이조각ᄋᆞᆯ돌아도모로매반ᄃᆞ시位ᄅᆞᆯ올모리니라조각ᄋᆞᆫ처ᅀᅥᆷ날젯일후미니位올모매가면眞實ㅅ조각이ᄒᆞ마나빗기자ᄇᆞ며갓고로ᄡᅳ며구ᄌᆞ며됴ᄒᆞ며바ᄅᆞ며빗그며東녀긔소ᄉᆞ며西ㅅ녀긔업서ᄒᆞᆫ번노ᄒᆞ야ᄒᆞᆫ번가도매큰用이나타法에잇디아니ᄒᆞ야잇다가ᄯᅡ해걸안ᄌᆞᆫ師子ㅣᄀᆞᆮᄒᆞ며잇다가金剛보ᄇᆡᆺ갈ᄀᆞᆮᄒᆞ며잇다가안자셔一千가짓差別ᄅᆞᆯ그ᄎᆞ며잇다가믈ᄭᅧᆯᄋᆞᆯ좃ᄂᆞ니이엇던곧고咄_{咄호ᄆᆞᆫ샤ᇰ녜놀래ᄂᆞᆫ마리니몬젓(졋)쇽졀업슨마ᄅᆞᆯ업게ᄒᆞ논ᄠᅳ디라}

[요해]披毛戴角ᄒᆞ야入廛來ᄒᆞ니優鉢羅花ㅣ火裏開로다

터리가지고ᄲᅳᆯ이여져제드러오니優鉢羅ㅅ고지_{優鉢羅ᄂᆞᆫ西天ㅅ마리니예셔닐오맨靑蓮花ㅣ라ᄒᆞᄂᆞ니千年에ᅀᅡᄒᆞᆫ번프ᄂᆞ니라}븘소개프도다_{븘소개프다호ᄆᆞᆫ븘소개고지아니프ᄂᆞᆫ거시어ᄂᆞᆯᄒᆞᄆᆞᆯ며靑蓮花푸미오라니뿌(부)톄出世ᄒᆞ샤佛法니ᄅᆞ샤사ᄅᆞᆷ濟渡ᄒᆞ샤미쉽디몯ᄒᆞᆫ야ᇰᄌᆡᄀᆞᆮᄒᆞ니라}

轉却本來身ᄒᆞ고不入諸聖位ᄒᆞ야ᅀᅡ名爲本色人ᄋᆡ行履處ㅣ니到這裏ᄒᆞ얀不居正位ᄒᆞ며不擇其身ᄒᆞ야却入異類ᄒᆞ야披毛戴角ᄒᆞ며牽犂拽來ᄒᆞ야曾無異念ᄒᆞᆯᄉᆡ故로云호ᄃᆡ一切物類에比況不濟ᄒᆞ며千般智力으로計較不成ᄒᆞ야全超無影迹ᄒᆞ며不墮古今機ㅣ라大地山河ㅣ都是~ㄴ(낙장)(自己森羅萬像皆同一色十方世界無不是解脫門十方世界無不是說法度生時方信道護明不從兜率降靑蓮花朶火中開)...

...

[요해]一雨法雨煩惱火滅一聲法雷無明山隤且道阿那个是振法雷雨法雨布慈雲洒甘露底㨾子毘婆尸佛早留心直至而今不得妙鑊湯爐炭吹敎滅大費力在

...겨시니라

鑊湯爐炭ᄂᆞᆯ吹敎滅ᄒᆞ고釰樹刀山ᄋᆞᆯ喝使摧로다

鑊湯爐炭地獄ᄋᆞᆯ부러업게ᄒᆞ고釰樹刀山地獄ᄋᆞᆯ놀라야믈어디게ᄒᆞ도다

[요해]旣然如是어시니且道ᄒᆞ라揮手搖唇ᄒᆞ며費力勞神ᄒᆞ야忉忉怛怛ᄒᆞ야作伊麽神通ᄒᆞ니不是不是타這漢이與大地衆生ᄋᆞ로同脫輪廻ᄒᆞ며共十方諸佛ᄒᆞ야同是成道ᄒᆞ니作伊麽話會ᄒᆞ면入地獄이如箭射ᄒᆞ야不被這漢ᄋᆡ所救ᄒᆞ리라

ᄒᆞ마이러커시니니ᄅᆞ라쏜(손)휫두ᄅᆞ며입놀이며힘ᄡᅳ며ᄆᆞᅀᆞᆷᄀᆞᆺ비브즈러니勤心ᄒᆞ야이런神通ᄋᆞᆯᄒᆞ니외다외다이모디大地衆生ᄋᆞ로ᄒᆞᆫᄢᅴ구오뇨ᄆᆞᆯ버ᄉᆞ며十方諸佛와ᄒᆞ야ᄒᆞᆫᄢᅴ道理ᄅᆞᆯ일오니이런마ᄅᆞᆯᄒᆞ면地獄애드로미살ᄡᅩᄃᆞᆺᄒᆞ야이모ᄃᆡ濟渡ᄅᆞᆯ닙디몯ᄒᆞ리라

金鏁玄關애留不住ᅟᅵᆯᄉᆡ行於異路ᄒᆞ야且輪廻ᄒᆞ놋다

쇠ᄌᆞᆷ곤玄妙ᄒᆞᆫ關애잇디몯ᄒᆞ릴ᄉᆡ다ᄅᆞᆫ길헤ᄃᆞᆫ녀구으니놋다

[요해]不住正位이니那守於偏이리오二邊不住ᅟᅵᆯᄉᆡ行於異類ᄒᆞᄂᆞ니問ᄒᆞ노라異則不類오類則不異ᄒᆞ니立名異類ᄂᆞᆫ其義ㅣ安在오荅云호ᄃᆡ古人이釋異類者ㅣ甚衆ᄒᆞ니言徃來異類者ᄂᆞᆫ體別이爲異오非一이爲類ㅣ며性常輪廻ㅣ爲類오性不自失이爲異ㅣ라言菩薩異類者ᄂᆞᆫ形似六道衆生ㅣ爲類ㅣ오自己不同生死輪廻ㅣ爲異ㅣ라言沙門異類者ᄂᆞᆫ披毛戴角이爲類ㅣ오得不變易이爲異ㅣ라言宗門中異類者ᄂᆞᆫ一切語言이爲類ㅣ오智不到處ㅣ爲異ㅣ라此ㅣ是洞下宗風엣論異類者ㅣ니若向臨濟門中ᄒᆞ야言異類者ᅟᅵᆫ댄轟雷制電ᄒᆞ며驚天動地ᄒᆞ야無轉無位ᄒᆞ며不異不類ᄒᆞ야與十方聖凡ᄋᆞ로同生同死ᄒᆞ며同出同入ᄒᆞ야你若入鑊湯이어든我也도入鑊湯ᄒᆞ고你若入爐炭이어든我也도入爐炭ᄒᆞ야藏身處에沒蹤迹ᄒᆞ며沒蹤迹處에莫藏身ᄒᆞ야ᅀᅡ方始得名爲異類라ᄒᆞ리라

正位예잇디아니커니엣디偏位예이시리오두고대잇디아니ᄒᆞᆯᄉᆡ곧異類에ᄃᆞᆫ니ᄂᆞ니묻노라다ᄅᆞ면무리아니오무리면다ᄅᆞ디아니ᄒᆞᄂᆞ니일후ᄆᆞᆯ다ᄅᆞᆫ무리라혼ᄠᅳ든엣디오ᄃᆡ답호ᄃᆡ녯사ᄅᆞ미異類ᄅᆞᆯ사교미ᄀᆞ자ᇰ하니徃來異類ᄂᆞᆫ야ᇰᄌᆡ달오미異오_{一切ㅅ소ᄅᆡ와빗과됴ᄒᆞ며구ᄌᆞᆫᄎᆞ례라}ᄒᆞᆫ나히아니로미類ㅣ며_{소ᄅᆡ와빗과됴홈과구조미둘히아닐ᄉᆡ니라}性이每常輪迴호미類ㅣ오性이本來로일티아니호미異라菩薩異類ᄂᆞᆫ야ᇰᄌᆡ六道衆生ᄀᆞᆮ호미類ㅣ오_{아래로모ᄃᆞᆫ根機예마ᄌᆞᆯ시라}ᄌᆞ걧모미生死輪迴와ᄀᆞᆮ디아니호미異라_{우후로一定ᄒᆞᆫ理예마ᄌᆞᆯᄉᆡ니라}沙門異類ᄂᆞᆫ텨(터)리가지고ᄲᅳᆯ유미類ㅣ오_{모ᄃᆞᆫ聖人位예드디아니ᄒᆞᆯ시라}고티디몯ᄒᆞ요미異라_{이제ᄅᆞᆯ조히니ᄌᆞᆯᄉᆡ니라이제랏마ᄅᆞᆫ衆生邊엣이리라}宗門엣異類ᄂᆞᆫ一切ㅅ말ᄉᆞᆷ이類오_{무로미이시며對答이이슈미라}智慧몯갈고디異라_{짐작(쟉)ᄒᆞ면崖州萬里ᄃᆞ외리라崖州萬里ᄂᆞᆫᄀᆞ자ᇰ먼귀햐ᇰ가ᄂᆞᆫᄯᅡ히니佛法에젼혀어머리모ᄅᆞᄯᅡ마리라}이洞下宗風엣異類議論혼마리니_{洞下ᄂᆞᆫ曹洞宗이라}ᄒᆞ다가臨濟門에가_{臨濟ᄂᆞᆫ六祖後에위두ᄒᆞᆫ宗이니義玄禪師ㅣ宗主ㅣ라}異類ᄅᆞᆯ닐올딘댄울에우ᄅᆞᄃᆞᆺᄒᆞ며번개티ᄃᆞᆺᄒᆞ며하ᄂᆞᆯᄒᆞᆯ놀래며ᄯᅡᄒᆞᆯ뮈워올몸도업스며位次도업스며다ᄅᆞ도아니ᄒᆞ며물도아니라十方앳聖人과凡夫와로ᄒᆞᆫᄢᅴ살며ᄒᆞᆫᄢᅴ주그며ᄒᆞᆫᄢᅴ나며ᄒᆞᆫᄢᅴ드러너옷鑊湯地獄애들어ᄃᆞᆫ나도鑊湯地獄애들오너옷爐炭地獄애들어(ᄃᆞᆫ)~ㄴ(낙장)

正位前

[요해]枯木岩前即所謂赤瀟瀟乾剝剝地亦所謂常獨行常獨步田地若也於此透脫便能驅耕夫之牛奪飢人之食殺人不眨底手脚其或未然怳如鶴捿月殿雪覆蘆花除非夙有靈骨向這裏未免遲廻何也寶鏡初磨影質難分長江風靜水天一色

...(처)ᅀᅥᆷ닷ᄀᆞ니그르메와얼구ᄅᆞᆯᄀᆞᆯᄒᆡ디몯ᄒᆞ며긴江애ᄇᆞᄅᆞ미寂靜ᄒᆞ니믈와하ᄂᆞᆯ왜ᄒᆞᆫ비치로다

鷺鷥ㅣ立雪로도非同色이며明月蘆花도不似他ㅣ로다

하야로비누네셔셔도비치ᄒᆞᆫ가지아니며ᄇᆞᆯᄀᆞᆫᄃᆞᆯ와ᄀᆞᆳ곳도뎌ᄀᆞᆮ디아니ᄒᆞ도다

[요해]若論這般境界ㄴ댄鷺鷥애白雪와明月애蘆花로도類之不齊로다

ᄒᆞ다가이고댓境界ᄅᆞᆯ議論홀뎬하야로비와ᄒᆡᆫ눈과ᄇᆞᆯᄀᆞᆫᄃᆞᆯ와ᄀᆞᆳ곳과로도가ᄌᆞᆯ벼도맛디아니ᄒᆞ도다

了了了時예無所了ㅣ오玄玄玄處에도亦須呵ㅣ로다

ᄆᆞ초ᄆᆞᆯᄆᆞ차ᄆᆞᄎᆞᆫ고대ᄆᆞ초미업스며玄妙호미玄妙ᄒᆞ야玄妙ᄒᆞᆫ고대도ᄯᅩ웃우도다

[요해]到這裏ᄒᆞ야讃不及이며毁不及이니若了一이면萬事ᄅᆞᆯ畢ᄒᆞ야天上人間애古今不識ᄒᆞ며能了所了二了ᄅᆞᆯ皆了ᄒᆞ야終無可了ᄒᆞ며體玄用玄二玄이俱玄ᄒᆞ야畢竟에無狀이라進步也錯ᄒᆞ며退步也錯ᄒᆞ며拍手呵呵咲一場也ㅣ라도錯ᄒᆞ니將錯就錯이又重大錯이로다且道하라如何下脚고若論這个事ᅟᅵᆫ댄看取下文看ᄒᆞ라

이고대완기리도몯ᄒᆞ며허도몯ᄒᆞ리니ᄒᆞ다가ᄒᆞᆫ일옷ᄉᆞᄆᆞᄎᆞ면一萬이ᄅᆞᆯᄆᆞ차天上人間애이제와녜와ᄅᆞᆯ아디몯ᄒᆞ며수이알며아ᄂᆞᆫ것둘아로ᄆᆞᆯ아라내죠ᇰ애아롤고디업스며얼구리玄妙ᄒᆞ며用이玄妙ᄒᆞ야두玄妙호미다玄妙ᄒᆞ야내죠ᇰ애얼구리업서나ᅀᅡ도외며믈러도외며소ᇇ벽티고ᄒᆞᆫ번우ᅀᅥ도외니외욤가지고왼ᄯᅡ해가미ᄯᅩ다시ᄀᆞ자ᇰ외도다니ᄅᆞ라엣디ᄇᆞᆲ드ᄃᆡ료ᄒᆞ다가이곧곳議論홀딘댄아랫文字ᄅᆞᆯ보라

殷勤爲唱玄中曲ᄒᆞ노니空裏蟾光ᄋᆞᆯ撮得麽아

브즈러니爲ᄒᆞ야玄妙ᄒᆞᆫ中엣놀애ᄅᆞᆯ브르노니虛空앳ᄃᆞᆳ비츨쥘것가

[요해]是什麽語言고錯다末後一圈이如揮大阿相似ᄒᆞ니且道ᄒᆞ라空裏蟾光ᄋᆞᆯ看之有分이오撮之不得이니若也撮之ᅟᅵᆫ댄許你寬腸大肚漢이라호리라

이므스기랏말오외다내죠ᇱᄒᆞᆫ도리미ᄂᆞᆯ난갈휫두ᄅᆞᄃᆞᆺᄒᆞ니니ᄅᆞ라虛空소갯ᄃᆞᆳ비츤보ᄆᆞᆫᄒᆞ려니와쥐디몯ᄒᆞ리니ᄒᆞ다가쥐린댄너를ᄇᆡᅀᆞᆯ큰모디(미)라호리라圈羣逺切養畜之閑肚董五切胃也

41ㄱ趙州三門

序

[요해]文殊ᄂᆞᆫ只是當人ᄂᆡ一切智體니所謂靈知覺性也ㅣ라

문슈ᄂᆞᆫ곧사ᄅᆞᄆᆡ일쳬디톄니닐온려ᇰ디각셔ᇰ이라

[요해]觀音ᄂᆞᆫ只是當人ᄂᆡ一切隨物ᄒᆞ야應現底機關ㅣ라

관음ᄋᆞᆫ곧사ᄅᆞᄆᆡ일쳿므를조챠(차)ᄃᆡ답ᄒᆞ야낟ᄂᆞᆫ조각기라

[요해]普贒ᄂᆞᆫ只是一切衆生ᄋᆡ日用앳動作施爲와善惡二業ㅣ라

보현ᄂᆞᆫ곧일쳬쥬ᇰᄉᆡᇰᄋᆡ일요ᇰ앳닐무여ᄒᆞ논일와됴ᄒᆞ며구ᄌᆞᆫ두업뵈라

[요해]但以衆生이妄想執著으로不能拈出三門ᄒᆞ야一一現前ᄒᆞᆯᄉᆡ古德이不吝慈悲ᄒᆞ샤直指平常消息ᄒᆞ시니若也擬議ᅟᅵᆫ댄早已蹉過ㅣ리라

오직쥬ᇰᄉᆡᇰ이마ᇰ샤ᇰ집탹그로르ᇰ히세문ᄅᆞᆯ자바내야낫낫치알ᄑᆡ낟게몯ᄒᆞᆯᄉᆡ고덕이자비ᄅᆞᆯ앗기디아니ᄒᆞ샤바ᄅᆞ샤ᇰ녯일로ᄀᆞᄅᆞ치시니ᄒᆞ다가이런가뎌런가의론ᄒᆞ면ᄇᆞᆯ셔외여가리라

文殊面目

文殊面目이라

文殊ㅅ야ᇰᄌᆡ라

欲識文殊貌ᅟᅵᆫ댄頭頭에路不阿ㅣ니라

文殊ㅅᄂᆞᄎᆞᆯ알오져홀딘댄곧곧마다길히굽디아니ᄒᆞ니라

東林은靑鬱密ᄒᆞ고南嶽ᄋᆞᆫ碧嵯峨ㅣ로다天際옌懸空月ㅣ오庭前넨帶雨莎ㅣ로다

東녁수플른퍼러ᄒᆞ야거츨오南녁묏부리ᄂᆞᆫ퍼러ᄒᆞ야놉도다하ᄂᆞᆯᄭᆞᅀᆡᄂᆞᆫ虛空애ᄃᆞ리ᄃᆞᆯ옛고ᄠᅳᆯ앏ᄑᆡᄂᆞᆫ비마ᄌᆞᆫ莎ㅣ로다

[요해]莎ᄂᆞᆫ莖葉에周匝多毛ᄒᆞ니今之香附子ㅣ라

莎ᄂᆞᆫ줄기와닙페감ᄯᅩ로터리한프리니이졧(젯)香附子ㅣ라

[요해]此四句ᄂᆞᆫ文殊面目이頭頭에彰露ᄒᆞᆯ시라

이네句ᄂᆞᆫ文殊ㅅ야ᇰᄌᆡ귿귿마다나ᄐᆞᆯ시라

更尋玄妙相인댄箭已過新羅ᄒᆞ리라

가ᄉᆡ야玄妙ᄒᆞᆫ얼구ᄅᆞᆯᄎᆞ조려홀딘댄사리ᄇᆞᆯ셔新羅애디나도다

[요해]箭已過新羅ᄂᆞᆫ言此外예欲求文殊面目인댄遠之遠矣리라新羅ᄂᆞᆫ國名이라

사리ᄇᆞᆯ셔新羅애디나ᄆᆞᆫ이外예文殊ㅅ야ᇰᄌᆞᄅᆞᆯ求코져홀딘댄어멀리라닐오미라新羅ᄂᆞᆫ나랏일호미라

觀音妙唱

觀音妙唱이라

觀音ㅅ微妙ᄒᆞ신唱이라

[요해]妙唱ᄋᆞᆫ言其應之至也ㅣ라

妙唱ᄋᆞᆫ그ᄃᆡ답ᄒᆞ샤미지극ᄒᆞ실시라

欲叩圓通戶ᅟᅵᆫ댄圓通戶不封ᄒᆞ니라

圓通입ᄑᆞᆯ두드리고져홀딘댄圓通입피닫디아니ᄒᆞ야잇ᄂᆞ니라

[요해]圓ᄂᆞᆫ無留滯也ㅣ오通ᄋᆞᆫ無隔礙也ㅣ니如世間方物는滯於一處ᄒᆞ야不能轉動ㅣ어니와團圓之物는動著即運ᄒᆞ야了無留滯혼디如觀音이生滅滅生ᄒᆞ논情境이俱盡ᄒᆞ샤世出世法에不能限礙ᄒᆞ샤十方法界예隨念應機也ㅣ라

圓ᄂᆞᆫ머므러걸ᄭᅲ미업슬시오通ᄋᆞᆫ가료미업슬시니世間냇모난거ᄉᆞᆫᄒᆞᆫ고대이셔수이옮디몯거니와두려온거ᄉᆞᆫ다티면무여나젼혀머믈추미업논디觀音ㅅ나며업스며업스며나며ᄒᆞ논情境이_{情境ᄋᆞᆫ世間ㅅ혜아림ᄒᆞᄂᆞᆫᄠᅳᆮ디라}다업스샤世間과世間내난法에긔역ᄒᆞ며ᄀᆞ리디아니ᄒᆞ샤十方法界예念믈조차根機ᄅᆞᆯ對答ᄒᆞ욤ᄀᆞᆮᄒᆞ실시라

城樓엔鳴曉角ᄒᆞ고嶽寺앤起昏鍾ㅣ로다鶴唳ᄂᆞᆫ當淸夜ㅣ오泉聲은瀉碧峯이로다

城樓엔_{城樓ᄂᆞᆫ城門웃樓ㅣ라}새뱃쥬라ᄅᆞᆯ불오묏뎌렌어ᅀᆞᄅᆞᆷ부ᄑᆞᆯ티놋다鶴긔우로ᄆᆞᆫᄆᆞᆯᄀᆞᆫ바ᄆᆞᆯ當ᄒᆞ고ᄉᆡᆷ소ᄅᆡᄂᆞᆫ퍼런묏부리예셔흐르놋다

[요해]此四句ᄂᆞᆫ圓通妙門이常處에洞開ᄒᆞ야智以照之ᄒᆞ시며耳以聞之ᄒᆞ샤能覺所覺이皆合妙空ᄒᆞ야物物拈來無處不圓也ㅣ라

이네句ᄂᆞᆫ圓通微妙ᄒᆞᆫ門이고대훤히여려(러)智로비취시며귀로드르샤아ᄂᆞᆫ것과알이ᄂᆞᆫ거시다微妙ᄒᆞᆫ虛空과마자物物를자바오매아니두려온ᄯᅡ업스실시라

悲心이咸普廣이어니何處에不相從이리오

慈悲ㅅᄆᆞᅀᆞ미다너브시거시니어ᄂᆞ고대서ᄅᆞ좃디아니ᄒᆞ시리오

[요해]悲心은一切衆生ᄋᆡ本覺妙體이與一切諸佛眞性으로無殊ㅣ론故로大士圓通之體ㅣ遍在世間ᄒᆞ야與十方三世六道一切衆生으로同一悲仰ᄒᆞ샤令諸衆生으로於彼身心에獲諸無畏功德ᄒᆞ시ᄂᆞ니라

悲心은一切衆生ᄋᆡ本來아ᄂᆞᆫ微妙ᄒᆞᆫ얼구리一切諸佛ㅅ眞實ㅅᄆᆞᅀᆞᆷ과로다ᄅᆞ디아니ᄒᆞᆯᄉᆡ大士ㅅ_{大士ᄂᆞᆫ觀音미시니라}圓通얼구리世間내ᄀᆞᄃᆞᆨᄒᆞ야十方三世六道一切衆生으로슬피너겨울어ᅀᆞ옴과ᄒᆞᆫ가지샤衆生으로ᄒᆡ여금뎌몸과_{뎌ᄂᆞᆫ大士ㅣ시니라}ᄆᆞᅀᆞ매여러저홈업슨功德글얻게ᄒᆞ시ᄂᆞ니라

普贒妙用

普贒妙用이라

普贒ㅅ微妙ᄒᆞ신用이라

若謂識普賢인댄嵯峨애本不懸이로다

ᄒᆞ다가普賢ᄂᆞᆯ알오져홀딘댄노ᄑᆞᆫᄃᆡ本來ᄃᆞᆯ이디아니ᄒᆞ야잇ᄂᆞ니라(嵯)

[요해]嵯峨애本不懸ᄂᆞᆫ世人이聽菩薩名ᄒᆞ며聞菩薩行ᄒᆞ고以謂호ᄃᆡ我ㅣ愽地凡夫ㅣ어니焉能企及이리오ᄒᆞᄂᆞ니殊不知普賢妙用이即凡夫의所行ᄒᆞ논日用事也ㅣ로다

노ᄑᆞᆫᄃᆡ本來ᄃᆞᆯ이디아니호ᄆᆞᆫ世間ㅅ사ᄅᆞ미菩薩ㅅ일홈_{菩薩ᄂᆞᆫ普賢이시니라}듣ᄌᆞ오며菩薩ㅅᄒᆡᇰ뎍듣ᄌᆞᆸ고너교ᄃᆡ내미혹ᄒᆞᆫ凡夫ㅣ어니엣디能히믿ᄌᆞ오리오ᄒᆞᄂᆞ니젼혀普賢妙用이곧凡夫의ᄒᆞ논日用앳이린ᄃᆞᆯ모ᄅᆞ놋다

蘿攀ᄒᆞ야登絶頂ᄒᆞ고甁挈ᄒᆞ야採祥蓮ᄒᆞ놋다野老ᄂᆞᆫ燈松火ᄒᆞ고山童ᄋᆞᆫ汲月泉ᄒᆞ놋다

蘿ᄅᆞᆯ자바_{蘿ᄂᆞᆫ藤蘿ㅣ니緣木而生ᄒᆞᄂᆞ니라蘿ᄂᆞᆫ藤蘿ㅣ니남긔너추러나ᄂᆞᆫ거시라}노ᄑᆞᆫ뫼헤오ᄅᆞ고甁ᄋᆞᆯ자바祥瑞(ㅣ)로왼蓮ᄂᆞᆯᄏᆡ놋다_{祥蓮ᄂᆞᆫ非希奇之蓮이라言其馨香葩色이可愛ㅣ론디如世間之祥瑞ㅣ니라祥蓮ᄂᆞᆫ쉽디아니ᄒᆞᆫ蓮이아니라그내옴과곳비치ᄉᆞ라ᇰᄒᆞ오미世間냇祥瑞ㅣᄀᆞᆮ호ᄆᆞᆯ니ᄅᆞ니라}ᄆᆡ햇늘그니ᄂᆞᆫ솘브ᄅᆞᆯ혀고묏아ᄒᆡᄂᆞᆫᄃᆞ래ᄉᆡᄆᆞᆯ긷놋다

[요해]此四句ᄂᆞᆫ言一切衆生ᄋᆡ所作所爲ㅣ無非普賢大人境界ㅣ니라

이네句ᄂᆞᆫ一切衆生ᄋᆡᄒᆞ논배普賢大人境界아니니업슨ᄃᆞᆯ니ᄅᆞ니라

縱橫如未曉ᅟᅵᆫ댄對面ᄒᆞ야도隔重巓ᄒᆞ리라

바ᄅᆞ며빗근고대ᄒᆞ다가아디몯ᄒᆞ린댄ᄂᆞᄎᆞᆯ對ᄒᆞᅀᆞ와이셔도여러뫼히ᄀᆞ리리라

[요해]縱橫ᄋᆞᆫ世間ㅅ理事와曲直ᄒᆞ며逆順한境界ㅣ라

縱橫ᄋᆞᆫ世間ㅅ理와事와구브며바ᄅᆞ며어려오며됴ᄒᆞᆫ境界ㅣ니라